BAUCAU, 23 abríl 2024 (TATOLI) – Servisu Delegasaun Terirttorial Florestrál no Plantasaun Munisípiu Baucau distribui ai-oan hodi kuda iha suku 59.
Xefe Delegasaun Teritoriál Florestál no Plantasaun Munisípiu Baucau, Pascoal Afonso Belo, esplika, ai-oan ne’ebé fahè ba komunidade mai hosi empreza viveiru ai-oan ne’ebé bazeia ba pedidu husi autoridade suku sira iha Baucau.
“Ita kuda ai, nia objetivu atu halo protesaun konservasaun no ba futuru ida-ne’ebé iha to’os laran fo mos produsaun di’ak,” Xefe Delegasaun Territoriál Florestál no Plantasaun Munisípiu Baucau hateten iha Vila Nova, tersa ne’e.
Ai-oan hirak-ne’e kuda iha área bee-matan nune’e bele proteje bee inklui iha rai-lolon hodi asegura rai labele halai no hamosu dezastre naturál inklui iha to’os laran atu fo karbonu ou halo rai bokur liutan.
Ai-oan hirak-ne’e variedade kompostu ai-oan mahoni, ai-kakeu inkkui ai-oan fo fuan sira hanesan, sabraka, kulujaka no seluk tan.
“Husi Janeiru to’o ohin loron ita distribui ona ai-oan ba komunidade sira atu kuda kuaze rihun-sia resin hanesan kuda ona iha komunidade nia to’os laran,” Pascoal akresenta.
Florestál Baucau husu ba komunidade sira labele tesi ai-horis no sunu rai arbiru, tanba sei fo impaktu ba iklima hanesan udan monu rai tarde, erozaun inklui fo impaktu ba bee matan maran.
Autoridade Suku Lelalai, Salamao Fraga Fernandes, hateten, komunidade Suku Lelalai to’o agora kuda ona ai-oan hamutuk rihun-tolu-resin nee’bé alende Florestál Baucau, apoia mos husi parseiru dezenvolvimentu seluk.
“Balun agora mate tanba ami bee laiha, tempu bailoron ami kuru bee mak rega, balun moris agora bo’ot hotu ona,” Salamao Fernandes hateten.
Tuir dadus, Florestál Baucau hamutuk ho komunidade kuda ona ai-oan hamutuk rihun-9.050 iha aldeia 281, Suku 59 hosi postu administrativu neen iha munisipiu Baucau.
Jornalista : Natalino Belo
Editór : Rafael Ximenes de A. Belo
