DILI, 26 Abríl 2024 (TATOLI) – Guarda florestál sira husi munisípiu Lautém, Bobonaro, Viqueque, Manatuto no Manufahi halo apreensaun ba kilat manu 22 husi grupu kasadór sira ne’ebé halo atividade sein hetan lisensa.
Sekretáriu Estadu Floresta, Fernandino Vieira, kontinua fó orientasaun ba guarda florestál hodi halo prevensaun no halo patrullamentu rotina iha área ai-laran atu komunidade sira labele kasa ilegalmente animál sira.
Sekretáriu Estadu dehan kilat manu 22 ne’e, iha Lautém apreende 16, Bobonaro rua, Viqueque ida, Manatuto rua no Manufahi ida. “Kilat sira ne’e guarda florestál lori ona mai tau hamutuk iha armazein Floresta iha Colmera-Dili, hodi hein prosesu atu halo destruisaun”, governante informa iha Cacoli, ohin.
Fernandino Viera salienta katak proíbe atu ema kaer kilat manu no uza iha nasaun ne’e, tanba ne’e korpu guarda florestál nian hamutuk ho autoridade seguransa iha obrigasaun atu halo atuasaun ba arma sira ne’e hodi labele uza ba halo atividade sira sein autorizasaun.
“Sé maka sei uza ekipamentu sira ne’e laiha karta lisensa husi Diresaun Floresta no autoridade kompetente sira ne’ebé serbisu ba iha área seguransa hanesan Polísia no Forsa Defeza sei halo atuasaun”, nia afirma.
Membru governu ne’e husu ba guarda florestál sira kontrola área protejida ne’ebé konsidera fatin potensiál atu ema seluk ne’ebé laiha responsabilidade no laiha interese ba rekursu floresta nasaun ne’e nian labele tama hodi halo danu iha iha ai-laran tuan sira.
“Tanba rekursu ai-laran ne’ebé Timor-Leste iha mak hanesan animál, ai no bee sira mak rikusoin ne’ebé sei fó benefísiu ba nasaun, liuhusi prezensa turista sira-nian hodi vizita fatin sira ne’e”, dehan.
Iha sorin seluk, Diretór Nasional Floresta, Guilhermino Moniz, salienta kilat manu ne’ebé guarda sira rekolla husi komunidade ka grupu kasadór sira iha munisípiu lima ne’e akontese iha fulan-Abríl tinan ida ne’e no agora evidénsia sira ne’e iha ona diresaun ninia liman hodi hein desizaun atu halo destruisaun.
“Ita asegura hela sasán sira ne’e iha armazein Floresta nian. Ita informa ona ba superiór sira no agora ita hein de’it desizaun ruma, kuandu orienta ona halo destruisaun ita sei halo”, salienta.
Jornalista: Tomé Amado
Editora: Maria Auxiliadora
