BAUCAU, 26 abríl 2024 (TATOLI) – Serbisu Munisipál Protesaun Sívil no Jestaun Risku Dezastre Naturál sesta ne’e, realiza inkontru Konsellu Munisipál Protesaun Sívil, hodi koordena, haforsa rekuperasaun nune’e responde bainhira akontese dezastre naturál.
Diretór Serbisu Munisipál Jestaun Risku Dezastre Naturál Baucau, Celementino Pedro Barbosa, esplika, liuhusi enkontru ne’e, ho objetivu atu hametin espiritu ativa iha liña koordenasaun entre Konsellu Munisipál sira hodi fo resposta ba situasaun risku dezastre naturál, tanba adopta vizaun hanoin ida, forsa ida ba komunidade ne’ebé seguru no reziliente hasoru dezastre naturál.
“Liuhusi inkontru ne’e fanu seksaun sira hotu atu konjunta sai seksaun ne’ebé forte nune’e ba oin akontese dezastre naturál ruma hamutuk atende ba vitima sira,” Diretór Clementino P. Barbosa, hateten, iha Vila nova, sesta ne’e.
Bazeia ba misaun Konsellu Protesaun Sívil Munisípiu Baucau mak, hametin koordenasaun entre setór dezenvolvimentu sira no hasa’e kapasidade komunidade liuhusi formasaun espesifiku no fo protesaun atendementu ba komunidade, rikusoin inklu ambientál nian, bazeia ba dekretu lei Nu.03/2016 loron 16 marsu no alterasaun dalima dekretu Lei Nu.84/2023 loron 23 novembru.
Alende ne’e, tuir diploma ministeriál númeru 48/2016 sobre estabelesimentu Servisu Autoridade Munisipál no Administrasaun Munisipál, artigu 15 kona-ba kompeténsia dominu iha Protesaun Sívil.
Artigu 16 diploma ministeriál temi iha leten fó kompeténsia dominiu iha Jestaun Dezastre Naturál nian ho prinsipiu hamutuk halo prevensaun ba dezastre naturál no inundasaun, preparasaun emerjénsia ba vítima sira, resposta ba vítima sira no rekonstrusaun ba vítima sira-nia hela fatin bainhira dezastre liu ona.
“Ita aprofunda liutan ami-nia liña kordenasaun ba Konsellu Munisipál nia partisipasaun iha terrenu,” ezekutivu ne’e akresenta.
Konsellu Munisipál Protesaun Sívil no Jestaun Dezastre Naturál Baucau kompostu husi estrutura autoridade munisipál inklui parseiru serbisu dezenvolvimentu sira ne’ebé eziste iha munisípiu Baucau.
Autoridade Protesaun Sívil Munisípiu Baucau iha trimestrál dahuluk rejista vitíma hamutuk uma-kain 207 afeita ba dezastre naturál no inundasaun kompostu estragu kamaan 43, naton 29 inklui estragus tótal uma-kain 16.
Jornalista : Natalino Belo
Editór : Rafael Ximenes de A. Belo
