DILI, 27 Abríl 2024 (TATOLI) – Eleitór sira iha suku Madohi, iha Postu Administrativu Dom Aleixo, munisípiu Dili hahú ona eleisaun iha tuku 07:00 hodi hili sira-nia líder suku nian.
Iha oras hanesan, ekipa Komisaun Nasionál ba Eleisaun, pesoál aldeia no suku hahú halo rejistu ba kandidatu xefe aldeia ho nia delegadu sira, nune’e mós halo kampaña.
Suku ne’ebé mai ho nia totál eleitór hamutuk 11.332, kompostu husi mane 5.991 no feto 5.341 ne’e iha nia kandidatura ba suku foun ne’e hamutuk ema na’in-sia ne’ebé hakarak kompete iha eleisaun ne’e mak hanesan Alberto da Silva Gomes, Bernardino de Cristo Ferreira, Dedi da Costa, Francisco da Costa Ferreira, João Fátima Guterres, Joaquim Aparício Guterres, Julião Guterres, Júlio Fátima Soares no Marcelina da Silva.
Suku Madohi ne’e sei forma mós aldeia ualu mak hanesan 7 Dezembro, Anin Fuik, Beto Leste, Beto-Tasi, Loro Matan BT, Naroman BT, Rosário no Terra Santa.
Kandidatu Alberto da Silva Gomes, hateten sei serbisu hamutuk ho Governu atu dezenvolve nia planu prioridade iha suku bainhira eleitu.
Nia dehan, prioridade sira ne’e mak kria pás, kolabora ho Governu hadi’a estrada, halibur joven, koopera ho igreja no hadi’a administrasaun suku, serbisu hamutuk ho instituisaun relevante sira hodi fó formasaun ba joven iha língua ingleza, portugeza no komputadór.
“Hau hakarak kontribui ba pás no estabilidade iha sosiedade. Tanba ne’e mak ha’u kandidata aan ba xefe suku”, Alberto da Silva Gomes afirma iha sede suku Madohi.
Iha fatin hanesan, kandidata Marcelina da Silva, mós hato’o katak hakarak sai xefe suku suku hodi dezenvolve suku liu husi programa sira hanesan identifika ema terseira idade no ema defisiénsia atu hetan subsídiu hodi mellora sira-nia moris, hadi’a estrada no kanalizasaun bee, hamoos lixu no haree ba kestaun saúde.
“Hau garante manán, maibé depende ba povu nia eskolla. La manán mós sei iha períodu tuirmai”, nia dehan iha Tasi-Tolu.
Tuir observasaun Tatoli, eleisaun hahú la’o ho partisipasaun ativa hosi populasaun no iha mós seguransa hosi Polísia Nasionál Timor-Leste.
Lembra katak eleisaun suku ne’ebé akontese ohin ba de’it suku 10 iha munisípiu haat mak hanesan Aileu, Dili, Manatuto no Viqueque ho nia totál eleitór hamutuk 33.176.
Iha Dili, aleinde suku Madohi, eleisaun ne’e realiza mós iha suku Ailok, iha postu administrativu Kristo Rei, iha suku Bebonuk no Manleuana, iha postu Don Aleixo, no suku Mantelolaun iha postu administrativu Metinaro.
Jornalista: Jesuína Xavier
Editora: Maria Auxiliadora
