DILI, 27 Abríl 2024 (TATOLI) – Sekretáriu Estadu Protesaun Sivíl (SEPS) prepara ai-han pakote 800 hodi apoia ba vítima dezastre naturál iha territóriu, informa Sekretáriu Estadu tutela, Domingos Mariano Reis.
“Kada loron ami nafatin prontu iha oras 24 nia laran hodi responde saida maka vítima sira presiza, liuliu apoia emerjénsia sira”, Domingos Reis hateten iha Muzeu Rezisténsia.
Daudaun ne’e, SEPS liuhusi servisu Autoridade Protesaun Sivíl (APC) deskarrega ona ai-han hamutuk pakote 800 hodi prepara ba apoia vítima sira iha kada munisípiu ne’ebé sei sei fahe ba Ataúro ho pakote 50, munisípiu sira seluk 250 no Oé-Cusse mak hetan pakote 500.
“Ekipa APC serbisu hamutuk ho autoridade lokál, líder komunitáriu no Polísia Nasionál Timor-Leste hodi responde imediata ba dezastre naturál ne’ebé afeta vítima sira no tarde liu iha oras 20 nia laran”, nia esplika.
Apoiu emerjénsia ne’ebé Servisu Protesaun Sivíl prepara ona mak hanesan foos, mina, super mie, susubeen, masin-midar, masin no buat sira seluk ne’ebé maka bele tulun vítima sira hanesan materiál dapur nian, tasu, sanan, balde, bikan no lona sira.
Domingos Reis salienta katak kona-ba apoiu materiál ba situasaun emerjénsia sira ne’e sei tama fali iha faze daruak bainhira ekipa APC nian halo ona levantamentu dadus depois maka sei hare tuir ninia kategoria. Tanba iha apoiu materiál ne’ebé atu fó ba vítima sira ne’e sei haree ninia gravidade uma ne’ebé hetan danu iha aat kaman, natoon no aat totál.
“To’o agora seidauk fó apoiu materiál emerjénsia ba vítima sira, tanba ita sei halo identifikasaun ba uma sira ne’ebé maka hetan dezastre naturál. Depoizde identifikasaun ho kategoria tolu ne’e loos ona maka ita sei responde iha tempu besik”, realsa.
Dadus provizória ne’ebé ekipa APC rekolla ona iha baze hatudu katak to’o ohin loron rejista vítima dezastre hamutuk 849.
Jornalista: Tomé Amado
Editora: Maria Auxiliadora
