DILI, 28 abril 2024 (TAOLI) – Eleisaun ba lideransa iha suku Madohi, Postu Administrativu Dom Aleixo, Munisípiu Díli, hakat ba volta daruak tanba votu ne’ebé kandidatu xefe suku sira hetan la maioria votu ho totál 50%+1.
Suku Madohi realiza eleisuan suku iha loron 27 Abríl 2024, ho nia kandidatu xefe suku na’in-sia mak hanesan Kandidatu Xefe suku Alberto da Silva Gomes hetan votu 424, votu 1.592 ba Bernardino de Cristo Ferreira, votu 1.022 ba Dedi da Costa, votu 220 ba Francisco da Costa Andrade, votu 411 ba João Fãtima Guterres, votu 390 ba Joaquim Aparicio Guterres, votu 213 ba Julião Guterres, votu 402 ba Júlio Fatima Soares no votu 221 ba Marcelina da Silva.
Notísia relevante: Kandidatu xefe suku na´in-rua iha Builo hakat ba eleisaun segunda volta
Hosi rezultadu eleisaun órgaun suku iha Manleuana, hatudu kandidatu na’in-rua hanesan Bernardino d Cristo Fereira ho votu 1.592 no Dedi da Costa ho Votus 1.022, avansa ba eleisaun volta daruak ne’ebé sei realiza iha iha loron 13 Maiu 2024.
Responsável ba ekipa Komisaun Nasionál Eleisaun (CNE, siglá Portugés), Domingos Caunan, hateten suku Madohi sei avansa ba volta ronde iha eleisaun suku nian tanba votu kandidatu sira nian la prenxe kriteria ho 50%+1
“Avansa ba iha segunda volta ne’e tanba tuir formula ne’ebé ami iha tenke prenxe 50%+1, ida ne’e mak bele sai eleitu ba xefe suku, maibé eleisuan ne’e la to’o pursentu ida ne’e,” Responsável CNE, Domingos Caunan ba Agência TATOLI,I.P iha sede suku Madohi, ohin.
Iha suku Madohi iha totál votante hamutuk 11.332, maibé votante ne’ebé partisipa eleisaun hamutuk 5.102.
Iha eleisaun suku ne’e, sidadaun balun fó sira votu nulu hamutuk 170 no votu branku hamutuk 37 hosi totál númeru eleitór sira.
Notísia relevante: Eleitór 33.176 husi suku 10 sei partisipa eleisaun iha fulan ne’e
Jornalista: Jesuína Xavier
Editor: Florencio Miranda Ximenes
