DILI, 28 abríl 2024 (TATOLI)- Prezidente Repúblika, José Ramos Horta, hasoru malu ho Prezidente Asembleia Repúblika Portugueza, José P. C. Aguiar Branco, hodi ko’alia kona-bá relasaun bilaterál entre nasaun rua no dezenvolvimentu ekonómika nasaun rua-nian.
Sorumutuk entre lider rua ne’e hala’o iha Palácio de São Bento iha Lisboa, Portugal, foin lalais ne’e.
Reuniaun ne’e akontese tanba Timor-Leste ho Portugál buka atu hametin liután relasaun entre nasaun rua ne’ebé mai husi ligasaun istórika sira husi tempu ne’ebé Timor-Leste sai nu’udar koloniál Portugés to’o 1975.
Durante hasoru malu, Xefe Estadu ko’alia liu kona-ba posibilidade Portugal nian prezensa ekonómiku no asuntu komersiál iha Timor-Leste.
“Bainhira ita izola ita-nia aan, tanba ita populasaun hamutuk millaun 1.4, ida-ne’e halo ita-nia setór ekonómiku ki’ik tebes, maske Timor-Leste sei riku tebes iha futuru. Ho ema millaun 1.4 de’it ita haree hanesan merkadu ida-ne’ebé ladún prioridade iha komunidade globál nia oin. Maibé, bainhira ita tama iha ASEAN ho ema millaun 700, Timor-Leste sei sai nu’udar atrasaun boot ba investimentu hotu-hotu.” Prezidente Horta hateten liu husi nota ne’ebé Agência TATOLI asesu husi média Palásiu Prezidensiál, ohin.
Durante hasoru malu ne’e Xefe Estadu hato’o mós ba lider Parlamentár Portugal ne’e atu hametin liután relasaun ho Portugal nu’udar prioridade nasaun nian.
Partisipa mós iha enkontru ne’e Ministru Negosiu Estranjeiru no Kooperasaun (MNEK), Bendito Freitas no Embaixadora Timor-Leste ba Portugal, Isabel Amaral Guterres.
PR louva Ismaili Imamat ne’ebé promove pás
Alende ne’e,Prezidente Repúblika José Ramos Horta agradese no louva Ismaili Imamat ne’ebé promove pás no multilateralizmu.
“Agradese ba atensaun ba pás no multilateralizmu ne’ebé reprezenta husi Ismaili Imamat nia esforsu filantropiku globál. Prezidente Marcelo Rebelo de Sousa hatete katak Imamat hanesan ezemplu ida husi harii pás no multilateralizmu iha mundu, ida ne’e di’ak los,” Horta hatete liu husi nota ne’ebé Agência TATOLI asesu husi média Palásiu Prezidensiál, ohin.
Horta hato’o nia deklarasaun bainhira hamutuk ho lider sira husi nasaun sira seluk ne’ebé ko’alia lian Portugés iha selebrasaun ida-ne’ebé organiza husi Ismaili Imamat iha nia kadeira globál iha Lisboa Portugal.
Eventu ne’e marka tinan 50 Revolusaun Ai-funan ne’ebé lori liberdade ba Portugal no nasaun kolonia portugés nian.
Iha okaziaun ne’e, Prezidente Ramos Horta simu husi liurai-oan Rahim no liurai-oan Aly Muhammad iha Diwan, sede komunidade musulmanu Ismaili. Nazim Ahmad, Reprezentante Diplomátiku Imamat nian, ko’alia liu kona-ba servisu husi Rede Dezenvolvimentu Aga Khan ne’ebé servisu atu promove pluralizmu no dezenvolvimentu sosio-ekonómiku iha mundu tomak.
Selebrasaun ne’e hakle’an liután relasaun entre komunidade musulmanu Ismaili no mundu Lusofono, ligasaun sira ne’ebé mai husi tempu ne’ebé ema imigrante Ismaili sira hela iha Portugal iha tempu pos-revolusaun.
Nu’udar Timor-Leste no Portugal marka relasaun bilaterál tinan 20, Ramos Horta nia prezensa subliña parseria kulturál no ekonómika sira ne’ebé habelar komunidade sira-ne’e iha nivel globál.
Jornalista: Hortencio Sanchez
Editór : Florencio Miranda Ximenes
