DILI, 08 Jullu 2026 (TATOLI) – Governu aprova kriasaun Komisaun Interministeriál ba Monitorizasaun Projetu Konstrusaun Ospitál Militár (Ospitál Amizade Timor-Leste-Xina).
Ministru Defeza, Donaciano do Rosário Gomes, esplika katak projetu ida-ne’e, Konsellu Ministru iha loron 01 fulan-Jullu, aprezenta ona kona-ba projetu konstrusaun Ospitál Militár ba FALINTIL-Forsa Defeza Timor-Leste (F-FDTL), ne’ebé dezenvolve iha ámbitu kooperasaun bilaterál entre Timor-Leste no Repúblika Populár Xina, no ohin aprova tan Komisaun Interministeriál ba Monitorizasaun.
Nia dehan komisaun ne’e, ho natureza téknika no konsultiva, sei garante koordenasaun entre entidade públika sira ne’ebé envolve, monitoriza faze hotuhotu projetu nian, monitoriza kumprimentu ba prazu nomós rekizitu tékniku no legál sira, no mós identifika obstákulu ruma, hodi promove solusaun ne’ebé koordenada.
Tuir nia, rezolusaun Governu ne’e estabelese katak komisaun ne’e hala’o nia funsaun liuhusi grupu traballu rua maka ida ba koordenasaun ezekutiva, ne’ebé kompostu husi membru Governu no sira-nia reprezentant.
Funsaun daruak maka kona-ba akompañamentu tékniku ba obra, ne’ebé halibur reprezentante husi ministériu oioin, instituisaun públika sira no espesialista. Ho bjetivu atu garante ezekusaun di’ak ba projetu nomós ninia koordenasaun ho sistema saúde nasionál no prioridade estratéjika sira Estadu nian.
Estabelesimentu komisaun ida-ne’e ho objetivu atu garante ezekusaun loloos ba projetu, hodi promove padraun kualidade, transparénsia no efisiénsia ne’ebé aas.
Ospitál Amizade Timor-Leste-Xina sei hametin kapasidade operasionál F-FDTL nian, komplementa servisu sira Servisu Nasionál Saúde nian, hadi’a resposta ba emerjénsia no kontribui ba reforsu kapasidade nasionál iha área saúde, ba benefísiu Forsa Defeza no populasaun ein-jerál.
Notísia relevante: Governu Xina oferese millaun $20 ba konstrusaun Ospitál Militár
Jornalista: Arminda Fonseca
Editora: Maria Auxiliadora
