Xefe Estadu kondekora diplomata nasionál-internasionál na’in-neen iha Portugal
DILI, 28 abríl 2024 (TATOLI)-Prezidente Repúblika, José Ramos Horta, realiza serimonia ofisiál ida iha Embaixada Timor-Leste nian iha Belém, Lisboa Portugal hodi kondekora medalla méritu no orden Timor-Leste ba timoroan na’in-tolu no estranjeiru na’in-tolu ne’ebé durante ne’e servisu maka’as ba Timor-Leste nia adezaun ba Organizasaun Mundiál Komérsiu (OMK) no soberania Timor-Leste nian.
Eventu ne’e selebra papél influénsia ne’ebé hala’o husi ema na’in-neen, timoroan na’in-tolu no ema estranjeiru na’in tolu, hodi apoia dezenvolvimentu no soberania Timor-Leste nian.
“Medalla orden Timor-Leste no medalla méritu fó ba ema hirak ne’e hodi rekoñese sira-nia dedikasaun no servisu ba nasaun Timor-Leste,” katak Xefe Estadu liuhusi nota ne’ebé Agência TATOLI asesu husi média Palásiu Prezidensiál, ohin.
Kondekoradu hirak mak hanesan, Embaixadora Timor-Leste nian ba Jeneva, Maria de Lurdes Martins de Sousa Bessa, Embaixadór Portugal ba Jeneva, Rui Filipe Monteiro Belo Macieira, ne’ebé simu medalla Kolar Orden Timor-Leste. Nune’e, Xefe Estadu fó omenajen ba kontribuisaun ne’ebé importante husi kada individuál ne’ebé simu onra.
Enkuantu Embaixadora Bessa nia esforsu iha Jeneva Embaixadór Macieira nia lideransa iha negosiasaun adezaun nian, artista Timor-Leste Moises Maia de Deus nia knananuk ne’ebé uza múzika famozu hodi mobiliza apoiu ba auto-determinasaun Timor-Leste nian, no profesór direitu internasionál, Nuno Antunes, nia konsellu ba Governu durante diskusaun fronteira marítima ho Australia.
Serimónia ne’e sai nu’udar deklarasaun ida-ne’ebé forte kona-ba Timor-Leste nia agradesementu ne’ebé la kole atu hala’o advokasia maka’as ba progresu nasaun foin-sa’e ida ne’e, hodi hametin Prezidente Ramos Horta nia kompromisu atu rekoñese servisu ne’ebé fó impaktu.
Jornalista: Hortencio Sanchez
Editór : Florencio Miranda Ximenes
