Care Internasionál no APC inaugura tanke bee-moos iha Luca
VIQUEQUE, 29 abríl 2024 (TATOLI)– Care Internasionál ho Autoridade Protesaun Sivíl (APC), segunda ne’e, inaugura tanke konservatóriu bee-moos hodi sustenta ba nesesidade família no atividade ortikultura iha aldeia Uma-Boot, Suku Luca, Postu Administrativu Viqueque Vila, munisípiu Viqueque.
Care hanesan organizasaun internasionál ne’ebé implementa programa iha munisípiu Viqueque foka ba komunidade sira iha área rurál hamutuk ho parseru organizasaun naun Govermental lokál Fundasaun Knu’a Haberan Komunidade (F-KHK) no Governu Timor Leste atu apoia komunidade sira.
“Ami mai inaugura tanke konservatóriu ne’ebé finansia hosi Care no implementa husi F-KHK Viqueque hodi konstrui tanke bee ba ita-nia Grupu iha Aldeia Uma-Boot, suku Luca. Hodi sustenta ba grupu sira-nia atividade ortikultura”, Diretór Care Timor Leste, Peter Gofellow, hateten hafoin ramata inaugura tanke bee-moos, iha aldeia Uma-Boot, ohin.
Ho fasilidade bee-moos referidu bele mitiga impaktu negativu sira husi dezastre no mudansa klimátika tanba bele asegura atu komunidade bele konsumu bee no utiliza ba ortikultura área remota
Bainhira bee-moos laiha, nia dehan iha Timor Leste feto dalabarak liu hetan espetasaun atu kuru bee hodi uza iha uma-laran, inklui ba hemu, tein, fase ropa, no hamoos uma laran.
“Konstrui tanke bee ho susesu ne’e hosi grupu Bata-metan ho nia membru na’in-20, ne’ebé maioria feto no hetan suporta mós mane,” nia afirma.
Iha fatin hanesan, Diretór F-KHK Viqueque, Agosto Pinto, haktuir objetivu husi kontrusaun tanke bee ba grupu Batametan ne’e atu preserva bee, uza ba komsumu no uza ba rega modo ne’ebé grupu sira kuda.
“Ami serbisu hamutuk hodi konstrui tanke hodi ajuda ita-nia komunidade aldeia ida-ne’e, asesu bee no konserva ba bee. Ami mós apoia fini modo musan ba ita grupu hodi kuda iha sira-nia toos”, nia informa.
Entretantu, Koordenadora Grupu Bere-metan aldeia Uma-Boot, Suku Luca, Joanina Gonzaga Soares Pinto, husu agradese ba Care no F-KHK ne’ebé fó apoia materiál sira hanesan semente, besi no mangeira metan hodi bele konstrui tanke.
“Ami agradese tebe-tebes ba Care no F-KHK ne’ebé ajuda material. Ami hahú konstrui iha fulan-Marsu ho medida naruk metru rua no luhan metru ida ho balun. Ha’u sente tanke ne’e sufisiente ona ba ami uma-kain 20-resin ne’ebé hela besik malu”, nia agradese.
Ho bee ne’e, nia dehan, iha Maiu, grupu hahú kuda modo. No modo sira-ne’ebé ami kuda sei suporta ba ekonómia familiár.
Iha inaugurasaun ne’e hetan asiste husi Autoridade Protesaun Sivil (APC) nasionál, munisípiu, autoridade lokál, no abitante sira iha aldeia Uma Boot.
Jornalista : Vitorino Lopes da Costa
Editór : Florencio Miranda Ximenes
