COVALIMA, 29 Abríl 2024 (TATOLI) – Estrada husi postu Maucatar liga ba kapitál Covalima iha kondisaun grave ne’ebé difikulta populasaun lori nia produtu lokál á fa’an iha merkadu, informa administradór postu Maucatar, Laurentino de Jesus.
“Agora tempu udan, nune’e komunidade difísil atu lori sira-nia produtu lokál bá merkadu, tanba laiha valeta, nune’e bee suli tuir estrada laran, halo estrada sira ku’ak no nakfila ba mota”, autoridade postu ne’e dehan, ohin.
Nia relata katak maioria komunidade moris ho fila-liman hodi hetan netik osan atu uza ba nesesidade uma-laran nian no selu oan sira-nia eskola. Ho kondisaun estrada ne’ebé ladi’ak, hanesan líder postu nian hato’o komunidade nia preokupasaun hodi halo proposta, nune’e bele halo normalizasaun ba estrada hodi fasilita sira lori produtu bá merkadu.
Postu Maucatar iha suku sira mak hanesan Belecasak, Ogues, Holpilat no Matai ho nia populasaun 13.326 no xefe família 3.162.
Diretór Servisu Munisipál Obra Públika, Sidónio Gusmão, hateten Servisu Obra Públika finaliza ona halo levantamentu dadus ba kondisaun estrada rurál iha postu hitu iha suku 30.
Depoizde remata levantamentu dadus ba estrada, sira submete ona ba nasionál nune’e bele halo reabilitasaun ba estrada no suku balun tama ona iha lista ba prosesu konkursu no munisípiu hein de’it nia rezultadu.
Sidónio Gusmão informa katak Servisu Obra Públika simu mós pedidu husi administradór postu Tilomar kona-ba kondisaun estrada, nune’e submete ba nasionál atu haree nia prosesu reabilitasaun.
Covalima iha nia postu administrativu Fatululik, Fatumea, Fohorem, Tilomar, Maucatar, Suai no Zumalai ho nia suku 30, aldeia 148 ho nia populasaun bazeia Sensu Populasaun 2022 hamutuk 73.909.
Jornalista: Celestina Teles
Editora: Maria Auxiliadora
