DILI, 29 Abríl 2024 (TATOLI) – Sekretáriu Estadu ba Igualdade (SEI) ein ezersísiu, atuál Sekretáriu Estadu Komunikasaun Sosiál (SEKOMS), Expedito Dias Ximenes, husu ba mídia sira atu evita publikasaun notísia sira kona-ba violénsia hasoru feto sira, maibé divulga susesu ne’ebé sira halo ona.
Asuntu ida ne’e importante tebes, tanba ne’e SEI no SEKOMS sei halo kooperasaun ho órgaun komunikasaun sosiál sira iha Timor-Leste hodi halo sensibilizasaun kona-ba publikasaun notísia sira iha kada mídia, liuliu kona-ba violénsia hodi buka atu asegura dignidade inan-feton sira-nian perante públiku.
“Ha’u husu ba mídia sira, espesialmente ba kolega jornalista sira presiza halo kobertura mós ba susesu ne’ebé inan-feton sira iha, tanba mídia maka sai promotór ba vida komunidade saudavel”, Expedito Dias dehan hafoin enkontru ho mídia-na’in sira, iha Salaun Maria Gorette, Caicoli, ohin.
Nia salienta katak, tempu agora ne’e, susesu barak mak inan-feto sira halo ona iha sira-nia moris, inklui kontribui ba dezenvolvimentu nasaun nian. Tanba ne’e, iha oportunidade boot tebes ba mídia sira atu foti notísia sira ne’e no labele foti de’it mak kona-ba violénsia ne’ebé mane halo ba feto sira, feto halo ba mane sira ou feto halo ba labarik sira, inklui problema doméstiku sira.
“Tempu ida ohin loron ne’e, ita tenke husik ona notísia sira ne’ebé halo ita-nia públiku sira dúvida ho problema saida mak inan-feto sira enfrenta”, nia reireta.
Nune’e mós, Diretór-Jerál SEI, Armindo da Costa, salienta katak sorumutu entre SEI no mídia sira atu halo kooperasaun hodi haree kona-ba publikasaun notísia sira bele iha sensibilidade hodi asegura kestaun igualdade no inkluzaun. Nune’e, SEI hakarak hametin kooperasaun atu realiza mós formasaun ba jornalista sira, nune’e asegura publikasaun notísia iha sensivel ba jéneru.
“Ita tau interese boot hodi kontinua alo kooperasaun ho medíia sira atu sira bele hola papél oinsá bele iha sensibilidade atu asegura asuntu igualdade no inkluzaun iha publikasaun sira”, realsa.
Jornalista: Tomé Amado
Editora: Maria Auxiliadora
