INETL fasilita formasaun ba autoridade lokál kona-ba dadus populasaun iha RAEOA
OÉ-CUSSE, 29 abríl 2024 (TATOLI) – Institutu Nasionál Estatístika Timor-Leste, Institutu Públiku (INETL.IP), segunda ne’e, realiza formasaun kona-bá Civil Registration and Vital Statistics (CRVS) ba xefe suku 18 atu kompila dadus populasaun iha Rejiaun Administrativa Espesiál Oé-Cusse Ambeno (RAEOA).
“Objetivu husi kapasitasaun ne’e hodi rekolla no kompila dadus populasaun nivél moris no mate, migrasaun esternál no internál iha territóriu RAEOA ho efisiénsia no efisikasia,” Prezidente Interina INETL.IP, Maria do Carmo Moreira, hateten iha sesaun abertura hala’o iha Alfándega Palaban.
Maria do Carmo Moreira, hateten, formasaun ne’e realiza durante loron lima, hahú segunda ne’e to’o sesta semana ne’e, tanba formatu ne’ebé INETL.IP atribui ba autoridade lokál ho padraun internasionál, no ema-ne’ebé atu fornese informasaun, tenke komprende didi’ak formatu ne’e, tanba atu halo kompilasaun dadus, la’ós rekolla dadus hodi halo entrevista kada uma-kain.
“Ida-ne’e ami kompila fila-fali de’it, informasaun saida mak xefe suku sira iha, kompilasaun ba CRVS, atu hatene movimentu komunidade iha nível suku no aldeia liu-liu kona-bá dadús ema mate no dadus ema moris, inklui sidadaun estranjeiru sira,” nia katak.
Sekretáriu Rejionál ba Asuntu Administrasaun, Andre La’o, apresia ho inisiativa husi INETL, bele fasilita fomasaun ba lideransa komunitáriu sira atu kompillla dadus ho ho loloos.
“Ami nakloke ba parte hotu bele mai lori programa saida de’it ami prontu atu koopera ho di’ak tanba nesesidade bá povu Oé-Cusse, ha’u husu ba xefe suku sira ho membru konsellu suku, atu akompaña didi’ak, tau inportánsia ba formasaun ne’e, tanba atu hatene progresu dezenvolvimentu ita tenki hatene dadús populasaun, estatístika ne’e save atu hatene klean, ita-nia populasaun feto-mane minoridade to’o joven,” nia apresia.
Jornalista: Abílio Elo Nini
Editór: Evaristo Soares Martins
