Top

Populasaun aldeia rua iha Dukurai Letefoho seidauk asesu liña eletrisidade

Ekipa téknika EDTL, E.P ko’a kotu fiu no hadi’a hela eletrisidade iha área Pasar Senggol-Bidau, kuarta (16/04/2024). Imajen/Tatoli

DILI, 29 abríl 2024 (TATOLI)—Reprezentante povu iha uma-fukun Parlamentu Nasionál (PN) liuhusi Deputadu bankada KHUNTO, Antonio Verdial de Sousa, husu Goveernu tau atensaun ba populasaun aldeia rua iha Dukurai husi postu administrativu Letefoho, munisípiu Ermera ne’ebé seidauk asesu liña eletrisidade.

“Populasaun iha suku Dukurai kompostu husi aldeia 13, postu administrativu Letefoho, munisípiu Ermera, daudaun ne’e aldeia sanulu resin-ida asesu ona enerjénsia elétrika, maibé falta de’it aldeia rua mak seidauk asesu liña eletrisidade. Aldeia rua ne´e mak aldeia Debululi no Hatuhei, ne’ebé baliza entre postu administrativu Hatubiliku munisípiu Ainaro sei nafatin moris iha nakukun laran,” nia hato’o liuhusi reuniaun plenária, segunda ne’e iha sala plenária Parlamentu

Aldeia rua ne’e, nia hatutan, iha tempu okupasaun Indonézia no iha tempu rezisténsia ne´e sai mós fatin estratéjiku ba komandante no membru Forças Armadas da Libertação Nacional de Timor-Leste (FALINTIL) sira atu halo funu.

Nune’e, hanesan reprezentante povu husu ba Governu Konstitusionál da-sia atu tau matan ba lian ne’ebé tatoli husi povu iha baze atu bele tau atensaun.

Iha parte seluk, Deputada CNRT, Aliança da Conceição Araújo, husu Eletrisidade Timor-Leste Empreza Públika (EDTL, E.P) atu tau atensaun hodi aruma fiu eletrsidade sira-ne’ebé monu naklekar tun ba rai iha territóriu laran hodi prevene mosu dezastre ruma.

“Husu EDTL, E.P atu tau atensaun aruma fiu sira naklekar tun ba rai iha territóriu, hanesan ezemplu iha Kampung Baru ne’ebé fiu naklekar tun ba rai arbiru loos. Iha ne’ebá mós negosiante sira faan sasán, ida-ne’e bele lori risku,” nia dehan.

Deputada FRETILIN, Maria Angelica Rangel, preokupa ho ahí eletridade mate lakan ne’ebé fó impaktu ba populasaun nia sasán eletrónika sira hanesan jeleira no sira seluk tan bele aat, nune’e husu ministériu kompetente atu tau atensaun.

Vise Ministru ba asuntu Parlamentár, Adérito Hugo da Costa, rejista preokupasaun husi Deputadu sira-nian hodi haruka ba ministériu tutela atu fó atensaun.

Jornalista : Nelson de Sousa

Editór        : Cancio Ximenes

Publisidade

Leave a Reply

Latest Post

error: Content is protected !!