COVALIMA, HEADLINE

Saúde Covalima rejista pasiente sofre infesaun respiratória aguda 3.563

Saúde Covalima rejista pasiente sofre infesaun respiratória aguda 3.563

Diretór Servisu Saúde Munisípiu Covalima, Domingos Sequeira. Foto/Celestina Teles.

COVALIMA, 29 Abríl  2024 (TATOLI) – Servisu Saúde Covalima rejista, entre janeiru no marsu, pasiente ne’ebé sofre infesaun respiratória aguda (IRA) hamutuk 3,563, informa diretór tutela, Domingos Sequeira.

Aleinde IRA, Saúde Covalima rejista mós tipu moras seluk mak hanesan kulit iha 953, diarreia aguda 733, dirreia ho raan 26, pneumonia 274 no moras kulit ka scabies.

Ho tipu moras sira ne’ebé iha, Servisu Saúde esforsu halo sensibilizasaun ba komunidade kona-ba halo prevensaun no kurativu ba moras sira ne’e hodi hetan tratamentu saúde iha postu hitu no sentru saúde 24 iha munisípiu referidu.

Infesaun respiratória mak infesaun ne’ebé mosu iha kualkér rejiaun tratu respiratória, hanesan inus, farinje, larinje, brónkeu, pulmaun no pleura. Infesaun ne’e akontese bainhira parte sira ne’e infetadu ho mikrorganizamu: vírus, baktéria, fungu ka parazita.

“Kauza husi infesaun respiratória aguda mai husi baktéria ne’ebé invade diretamente ita-nia dalan iis liuhosi matan, inus no ibun. Vírus sira ne’ebé hamosu moras ne’e mak hanesan rhinovirus, coronavirus, virus parainfluenza no adenovirus”, Domingos Sequeira esplika.

Fatór ne’ebé kontribui ba moras IRA ne’e mak iha relasaun ho indíviduu sira ne’ebé la simu imunizasaun, bebé ne’ebé la hetan susu husi inan, sistema imunolójiku fraku, má nutrisaun, moras krónika no ijéne pesoál la diak.

Sintoma IRA sei hatudu sinál hanesan inus-beensuli ka inus metin, mear-maran, isin kolen ka baruk, isin manas, gargante moras no ulun moras.

Tratamentu ba IRA tratamentu ho hemu ai-moruk mak médiku sira fó bainhira bá hala’o konsulta iha sentru saúde ka ospitál no tratamentu la uza ai-moruk mak hanesan suas ho bee-manas nia suar, hemu bee no jus barak, deskansa barak no seluk tan.

Iha 2023, Servisu Saúde Covalima rejista moras IRA hamutuk 12.318, moras kulit 2009, diarreita agudda 1.757, pneumonia 1.079, diarreia ho ran 68, no moras kulit 2.

Sidadaun André Carvalho dehan Saúde Covalima presiza halo esforsu hodi halo promosaun, nune’e bele redús númeru IRA.

“Ita hatene kada tinan Covalima sempre rejista moras IRA aas, entaun pesoál saúde presiza esforsu oinsá mak bele redús moras liuhosi fahe informasaun ba komunidade kona-ba prevensaun no sintóma husi moras IRA rasik.

Jornalista: Celestina Teles

Editora: Maria Auxiliadora

iklan
iklan

Leave a Reply

iklan
error: Content is protected !!