UPF-TNI sei realiza jogu amizade iha fronteira
OÉ-CUSSE, 29 abríl 2024 (TATOLI) – Polísia Nasionál Timor-Leste (PNTL), liuhusi Unidade Patrullamentu Fronteira (UPF), sei realiza jogu amizade ho Satuan Tugas Pengamanan Perbatasaun (Satgas-Pamtas), Sektor Barat, Tentara Nasionál Indonésia, Angkatan Darat (TNI-AD) Sektor Barat Yonkav 6 Naga Karimata, atu hametin liután lazu amizade iha liña fronteira.
“Ami ho parte Satgas TNI iha ona planu ida, atu realiza jogu foteból amizade, ne’ebé sei realiza fatin sei determina, tuir konkordánsia ne’ebé ami halo, depois ita realiza jogu amizade ne’e sei hala’o iha fulan maiu ne’e nia laran,” Komandante UPF, Superintendente Polísia, Euclides Belo, hateten, iha sorumutu border meetin iha sub-rejiaun Pássabe, foin lalais ne’e.
Notísia relevante: UPF- Satgas TNI organiza patrulla konjunta iha fronteira Haumeni Ana Pássabe
Autoridade Seguransa ne’e, fó sai, jogu amizade ne’e seidauk iha kalendáriu fiksa, sei iha diskusaun entre parte rua, hodi identifika fatin, alende ne’e mós sei hola parte mós husi membru Governu nasaun rua nian.
Iha fatin hanesan Komandante Satuan Tugas Pengamanan Perbatasaun (Satgas-Pamtas), Sektor Barat, Tentara Nasionál Indonésia, Angkatan Darat (TNI-AD) Sektor Barat Yonkav 6 Naga Karimata, Letnan Kolonel, Ronald Tampubolon, agradese tanba seguránsa nasaun rua bele realiza jogu amizade ne’e, hodi hametin liután liña kooperasaun iha área liña fronteira.
“Loos duni, ida-ne’e ita-nia atividade seluk, ita agradese tebes, tanba ne’e importante atu desportu hamutuk ne’ebé sei realiza iha tempu badak, ho nia objetivu atu hametin liután ita-nia lazu amizade, tanba ami maka loro-loron hamutuk iha fronteira, entaun atu haree no kontrola iha liña fronteira sira, enatun mosu inisiativa ida atu hametin liután ami-nia hamutuk ne’e, mak liuhusi derportu,” nia katak.
Notísia relevante: UPF no TNI realiza border meeting haforsa seguransa iha liña fronteira
Jornalista: Abílio Elo Nini
Editór: Evaristo Soares Martins
