Komunidade Uaibobo ladauk asesu estrada no eletrisidade
VIQUEQUE, 30 abríl 2024 (TATOLI)-Komunidade iha aldeia Uai-Bobo, suku Ossorua, Postu Adminitrasaun Ossu, Munisípiu Viqueque ladauk asesu ba estrada no eletrisidade, nune’e husu Governu fò atensaun sèriu hodi hetan naroman no asesu ba merkadu.
Xefe Aldeia Uaibobo, Francisco Soriono, dehan abitante aldeia Uaibobo tinan barak enfrenta kondisaun estrada ne’ebè grave hodi difikulta ba povu agrikultór sira lori sira-nia produtu ba asesu merkadu sira iha postu Uatulari no merkadu Ossu rasik.
“Ami iha ne’e moris izoladu liu tanba dalan husi suku Builo liga mai ami-nia aldeia Uaibobo no liga ba fali postu Uatulari mós kondisaun aat karreta asesu mai labele. Ami hakarak lori sai ami-nia produtu lokál bá faan iha merkadu defisil tebes, oinsa maka ami bele hadi’a ami-nia ekonómia uma laran tanba de’it impaktu husi estrada”, Autoridade lokàl ne’e hateten ba ba jornalista sira iha aldeia Uaibobo, ohin.
Produtu sira-ne’ebé abitante hosi aldeia Uai-Bobo iha mak kafé, kami, bua no produsaun toos nian ne’ebé agrikultór sira kuda, maibé la folin tanba impaktu estrada.
Alende ne’e, Autoridade lokál ne’e dehan abitante sira sei seidauk asesu ba eletrisidade.
“Ami-nia uma-kain sira hela iha aldeia ida-ne’e maioria simu solár panél, maibé tempu udan tu’ur iha nakukun. Ami hakarak sosa televisaun hodi haree notísia sira iha rai laran labele tanba laiha liña eletrisidade”, nia haktuir.
Defisil asesu ba postu saúde no eskola
Abitante sira iha aldeia referidu mòs susar asesu ba fasilidade saúde no eskola tanba la’o ain kuaze kilométru rua maka foin asesu ba eskola no postu saúde.
“Problema ida ami enfrenta mak dook husi fasilidade saúde ne’ebé moras emerjénsia ruma hanesan inan-isin rua atu partu, ami tenke hulan tanba trasnporte tama ladi’ak. Alende ne’e ami-nia oan sira tenke la’o dook mak foin asesu ba edukasaun”, nia preokupa.
Ho preokupasaun sira-ne’e, Xefe Aldeia ne’e fó hanoin ba Governu atu tau atensaun ba infraestutura sira hanesan estrada, eskola, klínika no eletrisidade atu povu bele asesu no goja ukun rasik an ida-ne’e.
Iha biban ne’e, Reprezenta komunidade aldeia Uai-Bobo, Laurentino de Araújo, reforsa, estrada, eletrisidade, klínika sai perioridade ba abitante sira.
“Ho kondisaun estrada ida-ne’e mak ami enfrenta durante ne’e iha ne’e mós ami asesu rede telefonika susar. Ami hakarak Governu tau matan ba ami-nia preokupasaun sira-ne’e”, nia sujere.
Nia dehan, área Uaibobo iha tempu rezisténsia sai mós knu’uk ba frente armada sira-nia fatin subar, maibé hetan liberdade povu iha ne’e mak sai terus nafatin.
Hataan ba preokupasaun sira-ne’e, Sekretáriu Estadu Protesaun Sivil (SEPS), Domingos Mariano Reis, informa, preokupasaun ba povu Uaibobu nian liuliu estrada, eletrisidade, saúde no edukasaun nia parte sei relata ba ministériu relevante sira hodi fó responta ba povu nian halerik.
“Preokupasaun sira-ne’e ha’u rekolla ona no sei relata fila fali ba kada ministériu relevante sira hodi haree asuntu infraestura sira-ne’e. Tanba iha ne’e kondisaun ita haree aat tebes, nune’e presiza hadia atu povu bele asesu ho di’ak”, nia afirma.
Enkuantu estrada husi aldeia Uaibobu to’o suku Builo kuaze kilométru hitu ne’ebé kondisaun aat. Aldeia referidu hamutuk uma-kain 64, ho totál abitante 361.
Jornalista : Vitorino Lopes da Costa
Editór : Florencio Miranda Ximenes
