DILI, 30 abríl 2024 (TATOLI)— Prezidente Konfederasaun Sindikatu Timor-Leste (KSTL), Almerio Vila Nova triste tanba Governu rejeita proposta lei ba saláriu mínimu $150.
“Proposta lei ne’ebé ita hato’o ba Governu ne’e ho valór orsamentu mínimu 150 maibé ida-ne’e Governu rejeita tiha. Entaun, hanesan mahon ba traballadór ha’u sente triste,” Almerio Vila Nova informa bainhira entrevista eskluziva iha edifísiu TATOLI horseik.
Nia dehan, proposta lei ba saláriu mínimu ne’ebé governu liuhusi Sekretáriu Estadu Formasaun Profisionál no Empregu (SEFOPE) aprezenta ba iha Konsellu Ministru iha loron 9 abríl 2024 no akonpaña hosi KSTL no mós Kamára Komérsiu Indústria (CCI-TL) maibé to’o iha ne’ebá Governu sira rejeita tiha proposta referida.
“Lakuna ne’ebé mak iha ita hadi’a neineik, maibé Governu tenke tetu saláriu mínimu $115 no $150 ida ne’ebé mak di’ak ba traballadór sira-nia nesesidade, maibé Governu haree liu de’it direitamente rejeita. Agora hanesan ne’e Governu sira lakohi atu sente traballadór vulneravel nia moris, tanba ne’e mak hanesan KSTL, CCI-TL no SEFOPE esforsu atu aproxima membru Governu sira nune’e bele lori fali proposta sira ne’e ba KM hodi deside fila fali iha tempu badak,” nia relata.
Prezidente KSTL, Almerio Vilanova, esplika, bainhira Governu rejeita proposta sira ne’e parte KSTL, CCI-TL no SEFOPE hato’o karta protesta ba Primeiru-ministru, Vise-primeiru Ministru no Prezidente Parlamentu Nasionál atu haree no tetu didi’ak bainhira foti desizaun ba saláriu mínimu traballadór nian.
“Ami aproxima polítika na’in sira ne’ebé mak durante ne’e seidauk komprende kona-ba saláriu mínimu traballadór nian, entaun oinsá ita besik ba sira atu esplika kona-ba situasaun saláriu mínimu tanba proposta sira ne’e ami prepara tinan naruk maibé Governu haree minutu balun de’it rejeita. Ida-ne’e ladun di’ak ba ami,” nia konklui.
Notísia relevante:Komemora loron traballadór: KSTL husu Governu aprova proposta saláriu mínimu
Jornalista : Felicidade Ximenes
Editór: Rafael Ximenes de A. Belo
