DILI, 30 abríl 2024 (TATOLI)– Prezidente Repúblika (PR), José Ramos Horta, liuhusi Servisu Sosiedade Sivíl no Asuntu Sosiál (SSAS), iha loron 26 to’o 27 fulan-Abríl, fó apoia sosiál ba komunidade na’in 60-resin, iha Suku Uma-Tolu, Postu Administrativu Lacluta no Suku Uma-Wain Kraik, Postu Administrativu Viqueque Vila inklui Suku Afaloicai, Postu Administrativu Uatulari, Munisípiu Viqueque.
Apoiu sosiál ne’e hala’o iha loron 26-27 fulan-Abríl ho benefisiariu hamutuk ema 60-resin.
“Atividade apoiu Sosiál Prezidénsia Repúblika, ita hala’o iha loron 24 fulan-Abríl, hahú iha Munisípiu Lautém, Baucau no Viqueque. Iha Viqueque, iha suku hirak ne’e, ita mós observa no koordena ho autoridade lokál tuir pedidu husi autoriedade lokál iha tinan kotuk ba sidadaun ne’ebé moris iha uma ne’ebé ho kondisaun grave tebes. Molok tinan ne’e ramata ita sei konstrui uma ba sira,’’ Assesór Prezidente Repúblika Quintiliano Moniz hatete liuhusi nota ne’ebé Agência TATOLI asesu husi mídia Palásiu Prezidensiál, ohin.
Atividade apoiu sosiál ne’e hetan orientasaun direta husi Xefe Estadu tanba iha nia mandatu desde 2007, tau programa prioriedade ida mak apoia sosiál ho objetivu atu tulun povu sira ne’ebé vulnervel liu.
Orsamentu ba atividade ne’e mai husi Prezidénsia Repúlika no hetan mós apoiu husi doadór internasionál sira.
Programa Apoiu Sosiál hanesan oferese hahan báziku, konstrui uma ba família vulnerável, tulun hadi’a eskola, oferese materiál desportu no atividade agrikóla inklui tulun atividade seluk konforme proposta ne’ebé tama iha Prezidénsia Repúblika.
Kona-bá programa kontrui uma, Prezidénsia ajuda de’it materiál no autoriedade lokál sei mobiliza nia ema hodi tulun harii uma.
Biban ne’e, Xefe Aldeia Uma-Uain Kraik, João da Costa, agradese ba apoiu hirak ne’ebé fó husi husi Prezidente Ramos Horta ba sira-nia komunidade.
“Ba ekipa Prezidénsia Repúblika, ne’ebé to’o mai iha baze hodi fahe apoiu sosiál ne’e. Ha’u reprezenta konsellu Suku ne’ebé hetan benefísiu ba apoiu ne’e, hato’o agradese wain tebes. Ami mós hato’o preokupasaun sira kona-bá problema sosiál seluk iha ami-nia suku,’’ dehan Xefe Aldeia ne’e.
Xefe Aldeia ne’e rekomenda mós ba Prezidénsia Repúblika, atu kontinua idetifika ema ne’ebé moris vulneravel liu hodi apoiu sira, liu-liu harii uma mahon ba sira ne’ebé faluk no sai oan-kiak tanba luta ba libertasaun.
Apoia ema ho moras mentál iha Baucau
Bainhira ekipa Prezidente Repúblika viajen hela husi Munisípiu Baucau atu ba Viqueque tuir dalan hetan sidadaun ida ho naran Fernando tenta para karreta ne’ebé ekipa sira sa’e hodi husu tulun.
Bainhira hasoru malu ho ekipa Prezidénsia Repúblika ne’ebé lidera husi Assesór Servisu Sosiedade Sivíl no Asuntu Sosiál, Prezidénsia Repúblika, Quintiliano Moníz, sidadaun Fernando hato’o katak “loloos ha’u ba merkadu, maibé tanba ha’u haree karreta ne’e Prezidente nian ne’ebé babain ajuda ema entaun ha’u mai hato’o hodi imi ba ajuda sidadaun ho difisiénsia ida iha ne’ebá’’.
Maske la-tama iha ajenda, Assesór Quintiliano Moníz deside hodi ba haree sidadaun refere iha aldeia Macadai de Cima, Suku Bucoli, Postu-Administrativu Baucau, Munisípiu Baucau.
To’o iha fatin, ekipa husi Prezidénsia Repúblika, haree duni kondisaun sidadaun ida ne’ebé moras mentál no sidadaun ida ho kondisaun difisiénsia iha ain no liman, inklui kazál ida ho idade 70-resin ne’ebé moris ho kondisaun susar tebes tanba laiha oan.
Apoiu ne’ebé oferese mak hanesan Foos, Mina ba tein, Manta inklui observa mós uma ida ne’ebé tempu badak sei konstrui ba família vulnerável ida iha Baucau.
Jornalista: Hortencio Sanchez
Editór: Florencio Miranda Ximenes
