VIQUEQUE, 01 marsu 2024 (TATOLI)- Bispu Dioseze Baucau, Dom Leandro Maria Alves, kuarta ne’e, nomea Amu José Gonzaga sai Padre Pároku iha Santa Teresinha do Menino Jesus hodi tau matan ba sarani postu administrativu Ossu, munisípiu Viqueque.
Biban ne’e, Bispu Dioseze Baucau, Dom Leandro Maria Alves, hateten Padre José Gonzaga mak lidera parókia Ossu hodi hala’o kna’ar Maromak nian no serbí ba sarani sira.
“Ba oin sarani no amu pároku tenke servisu hamutuk hodi fó limán ba malu, tenke fó mós liafuan di’ak ba malu, suporta ba malu hodi haburas ita-nia párokia Ossu”, Bispu Leandro hateten iha serimónia pose ba pároku Ossu, iha Igreja Santa Teresinha do Menino Jesus Ossu, ohin.
Amu Pároku José Gonzaga simu ona pose no nia sei serbí sakramentu sira liuliu sakramentu eukaristia no ba sarani sira oinsa buka partisipa iha eukaristia.
“La’ós ohin ha’u mai ne’e maka sarani sira mai partisipa, maibé sarani sira iha Ossu presiza partisipa iha eukaristia kada domingu hodi rona Maromak nian Evanjelu”, Dom Leandro hato’o.
Iha fatin hanesan, Padre José Gonzaga husu agradese ba Maromak no Santa Teresinha do Menino Jesus hanesan Padrueira ba Parókia Ossu, Bispu Dioseze Baucau ne’ebé fó konfiansa hodi hili nu’udar Amu Pároku ba parókia Santa Teresinha do Menino Jesus Ossu.
“Ba sarani tomak parókia Ossu ninian ho haraik-an mai ita servisu hamutuk hodi hadi’ak igreja ba oin. Tanba sei laiha parókia ida ne’ebé di’ak liu no laiha mós parókia ida ne’ebé aat liu tanba husi ita-boot sira mak iha Nai lulik ida ne’ebé Amu Bispu fó konfiansa atu hamutuk ho ita-boot sira hodi promove nafatin ita-nia fiar ida-idak ba oin”, Amu parókia ne’e afirma.
Iha serimónia pose ba párokia Ossu hetan partisipa husi Prezidente Autoridade Munisípiu (PAM) Viqueque, Francisco C.S de Gonzaga Soares, Komandante Polísia Nasionál Timor Leste (PNTL) munisípiu Viqueque, veteranu no hetan partisipa másimu husi sarani párokia Ossu.
Jornalista: Vitorino Lopes da Costa
Editór : Florencio Miranda Ximenes
