DILI, 02 maiu 2024 (TATOLI) – Autoridade Munisípiu Dili konsege lori fila família neen ba moris fatin Munisípiu Baucau, Postu Administrativu Laga ne’ebé hetan despesu administrativu iha kapitál Dili.
“Sira ne’ebé mak ami lori ba sira-nia moris fatin ne’e hamutuk família neen, ne’ebé hetan despezu administrativu iha kapitál Dili, entaun sira mai aprezenta aan iha AMD katak sira hakarak fila ba sira-nia moris fatin, entaun ami-nia ekipa lori fila sira ba sira-nia moris fatin Baucau-Laga”, Diretór Jestaun Merkadu no Turismu iha Autoridade Munisípiu Dili Artur Henrique hateten ba TATOLI iha nia kna’ar fatin AMD Matadoru, ohin.
Nia afirma, Autoridade Munisípiu Dili, to’o agora, nafatin nakloke ba ema hotu atu mai aprezenta aan atu lori fila ba moris fatin.
“Iha balun mai husu informasaun ona katak ami fila ne’e iha transporte atu lori fila ami ba ka lae, maibé ami hatan katak se ita boot sira prontu koopera, ami lori fila ita boot sira ba moris fatin maibé sira ne’ebé lakohi sei la lori fila”, nia hatutan
Artur Henrique hateten, iha loron 16 -24 abríl hamutuk ho ekipa Sekretáriu Estadu Asuntu Toponomia Organizasaun Urbana, hahú hasai ema sira ne’bé mak okupa espasu públiku no área protejida iha kapitál Dili.
“Ami hamutuk ho SEATOU, hahú iha loron 16 abríl to’o loron 24, ami hahú hasai ema sira ne’ebé mak okupa espasu públiku no área protejida iha kapitál Dili mak hanesan área Aitarak laran, Sengol Bidau Akadiruhun, Bidau Santana no Becora terminál, entaun ami rejista totál ema ne’ebé afeta eviksaun ne’e hamutuk 129, hosi ne’e Bidau Santana ho Becora Terminál hamutuk 37 Bidau Sengol Akadiruhun hamutuk 92 inklui Aitarak Laran hamutuk 23”, Henrique afirma.
Nia informa, ema ne’ebé mak hetan eviksaun laiha apoiu finanseira ruma hosi Governu tanba sira hela iha espasu públiku no área protejida.
“Durante ne’e, ami halo koordenasaun ho liña ministeriál hanesan Ministériu Adminsitrasaun Estatal (MAE), Ministériu Obras Publika (MOP), Sekretáriu Estadu Asuntu Toponímia Organizasaun Urbana, (SEATOU), Diresaun Nasionál Terras Propriedade no mós ekipa Jestaun Ekipamentu Apoiu Dezenvolvimentu Infraestrutura (IGEADE). Enatun sira ne’ebé mak hetan evikasaun ne’e la iha apoiu finanseira ruma, tanba sira ne’e uluk simu ona indeminizasaun iha tempu krize 2006 nian, entaun sira la ba sira-nia hela fatin, maibé sira mai halo uma iha espasu públiku no área protejidu ida-ne’e laiha indeminizasaun ba sira”, nia haktuir.
Nia relata, fatin ne’ebé mak hetan ona eviksaun ne’e, Governu iha planu atu halo buat ruma tanba ne’e sei iha aproximasaun nia laran.
“Fatin sira ne’ebé ita halo eviksaun ne’e ami ho ekipa konjunta sira tur hamutuk hodi halo aproximasaun mak foin halo buat ruma, maibé kona-ba atu halo saida, ne’e ami sei deside enkontru iha aban, kona-ba orsamentu no halo kontrusaun saida, ida-ne’e enkontru mak foin deside, agora ha’u labele ko’alia lai”, nia haktuir.
Iha fatin hanesan, Diretór Dezastre Naturál iha Munisípiu Dili, Jacinto Freitas, informa Autoridade Munisípiu Dili, ohin, hato’o ona lista eviksaun emerjénsia ba Autoridade Protesaun Sivil (APC) atu apoiu ba vítima despezu administrativu sira iha kapitál.
“Hosi parte Dezastre Naturál iha AMD nian, ohin hato’o ona lista eviksaun ba Autoridade Protesaun Sivil atu apoiu ba vítima despezu administrativu sira iha kapitál, hamutuk 120-resin”, Jacinto Freitas dehan.
Freitas hateten, ema sira ne’ebé mak hetan eviksaun ne’e mak hosi Bidau Santana no Becora Terminál hamutuk 37, Bidau Sengol hamutuk 92 no Aitarak laran hamutuk 23.
“Sira ne’ebé mak daudaun hela iha lona okos tasi ibun no mós sira seluk tama ona iha lista ne’ebé mak ita entrega ona ba APC, tanba karta ne’ebé mak ita haruka ba ne’e tau karta emerjénsia signifika semana oin hanesan ne’e bele hetan apoiu ruma hosi Governu”, nia konklui.
Jornalista : Felicidade Ximenes
