MCI enkoraja joven emprezariál mantein kontribui ekonomia
DILI, 02 maiu 2024 (TATOLI) – Ministru Komérsiu no Indústria (MCI), Filipus Nino Pereira, enkoraja joven emprezariál sira atu kontinua kontribui ba dezenvolvimentu ekonomia iha Timr-Leste.
“Ha’u orgullu ho vizita ida-ne’e, ha’u enkoraja ba joven emprezariál sira atu dezenvolve ekonomia iha ita-nia rain no mós nafatin suporta programa Governu nian ne’ebé mak iha”, Filipus Nino Pereira, informa ba jornalista sira bainhira remata vizita empreza AHHA Printing iha Vila Verde, ohin.
Nia afirma, hosi vizita ida-ne’e, empreza timoroan ne’ebé mak halo atividade ekonómika, liuliu negósiu, fó inspirasaun ba joven no mós emprendedór sira hodi halibur mal, harii empeza ida-ne’e hahú husi zero mai to’o susesu.
“Ita tenke orgullu ba sira-nia susesu ida-ne’e tanba ita ko’alia kona-ba dezenvolvimentu ekonómiku, ita ko’alia kona-ba diversifika ekonomia iha ita-nia rain”, nia informa.
Nia salienta, iha tinan barak nia-laran, Timor-Leste depende ba mina no gas, agora timoroan barak diversifika ekonomia liu husi atividade industriál, komersiál, peskas, agrikultura, pekuaria no turizmu.
“Ha’u hanoin ita presiza iha kapasidade boot liután atu mobiliza ita-nia joven sira ne’ebé mak ho idade produtivu no enerjia ne’ebe mak maka’as atu haree katak nasaun ida-ne’e nakonu ho potensialidade sira. Entaun ita orgullu tanba ita-nia joven sira matenek atu haree oportunidade ne’ebé mak sira aprende husi ema seluk mai promove fila fali”, nia subliña.
Tanba ne’e, MCI hakarak promove nafatin espiritu emprendendorizmu ba joven sira tanba sira mak sai autór prinsipál ba dezenvolvimentu ekonómiku iha TL.
“Ita la’os ko’alia de’it teoria, maibé pratikamente ita-nia joven sira hatudu espiritu emprendedorizmu, kontinua kontribui ba dezenvolve ita-nia ekonomia no dudu kresimentu ekonomia”, nia afirma.
Nia relata, hosi vizita ne’e, problema ne’ebé empreza sira hato’o mak kustu eletrisidade ne’ebé mak iha, entaun hosi ida-ne’e parte Governu sei introdús polítika atu uza solar paniel, atu bele diminui kustu eletridade.
“Sira hasoru difikuldade mak kustu eletrisidade, ha’u hanoin ita bele introdús polítika atu uza solar painel, nune’e bele dominui kustu eletrisidade no halo investimentu ba fatin ne’e tanba fatin ne’ebé mak sira uza ne’e espasu la sufisiente, karik ba futuru sira alarga tan sira-nia negósiu, entaun husi parte ami nian hamutuk ho Terras Propriedade bele fó prioridade ba ita-nia emprezáriu timoroan sira ne’ebé mak iha kapasidade atu bele hetan fatin própriu hodi bele kuda investimentu di’ak iha ita-nia rain”, nia esplika.
Iha fatin hanesan, koordenadór AHHA Printing ka Empreza Yana Ubada Unipesoal Lda, Ronaldo de Jesus Fatima, agradese ba Ministru Komérsiu no Indústria (MCI), nia vizita hodi haree direta fasilidade no sasan sira iha fatin ida-ne’e.
“Ami agradese ba MCI ne’ebé mak mai direta haree ami-nia produsaun sira hanesan dijitál printing, halo produsaun ba banner, konvite, marmer, plaka, depois ami mós iha produsaun ropa hanesan ba kamiza sira, ropa eskola nian no mós halo produsaun ba Jas no seluk tan”, Ronaldo de Jesus dehan.
Nia hateten, atu mellora di’ak liután fatin ne’e mak husu Governu atu apoiu tan espasu ruma tanba fatin ne’ebé mak daudaun iha ne’e la sufisiente atu hala’o servisu sira ne’e.
“Fatin sira ne’ebé mak daudaun ne’e iha la sufisiente maibé ami la’o ho buat ne’ebé mak iha, tanba ne’e ba futuru AHHA Printing sai fatin produsaun ne’ebé di’ak iha ita-nia rain”, nia haktuir.
Entertantu, pesoál sira ne’ebé mak servisu iha AHHA printing ne’e hamutuk 39, maioria joven.
Jornalista : Felicidade Ximenes
Editór : Zezito Silva
