VIQUEQUE, 02 maiu 2024 (TATOLI)- Prezidente Autoridade Munisípiu (PAM) Viqueque, Francisco Cruz S.de G Soares, kinta ne’e, halo fiskalizasaun no fó xamada atensaun ba empreza Dira Nova UNIP,Lda hodi aselera prosesu konstrusaun edifísiu Postu Administrativu Ossu, munisípiu Viqueque tanba konstrusaun tarde loos.
Bazeia ba rekomendasaun Sekretáriu Estadu Dezenvolvimentu Lokál (SEDL) nia-monitorizasaun ba projetu konstrusaun edifísiu Administrasaun Postu Administrativu Ossu iha fulan-Abríl katak konstrusaun referidu tarde loos.
Ho nune’e, Prezidente Autoridade Munisípiu (PAM) hamutuk ho Diretór Planeamentu Dezenvolvimentu Integradu Munisipál (PDIM), Joaquin Fernandes konvida Diretora Kompañia Dira Nova hodi orienta atu halais konstrusaun referidu.
“Ami fó oportunidade no estende tan masimu fulan-tolu tan atu finaliza konstrusaun ne’e. Ha’u husu Diretora kompañia ho nian-site enjeñeiru hodi bele aselera prosesu kontrusaun, nune’e autoridade postu Ossu bele utuliza ba servisu”, Prezidente Autoridade ne’e afirma hafoin sorumutu ho Diretór empreza Dira Nova iha administrasaun Viqueque, ohin.
Empreza kompromente finaliza lalais
Diretora kompañia Dira Nova UNIP Lda, Olandina da S.Amaral, agradese tebes ba oportunidade ne’ebé autoridade munisípiu fó ba kompañia, nune’e husu atu parte sira ne’ebé relevante servisu hamutuk ho kompaña hodi bele finaliza projetu ne’e.
“Ami kompañia agradese tebes ba oportunidade ne’ebé fó mai ami no ami prontu atu halo hotu projetu, ha’u husu ba Diretór hotu-hotu no tékniku servisu hamutuk nafatin ho kompaña oinsá bele finaliza to’o 100%”, nia garante.
Protetu konstrusaun edifísiu Administrasaun Postu Ossu ne’ebé hahú konstrusuan iha fulan-Juñu tinan 2023, ho durasaun kontratu fulan-neen, maibé projetu referidu seidauk finaliza.
Enkuantu, Progresu atuál ba servisu konstrusaun edifísiu APA Ossu taka ona kalen no konstrusaun moru sei paradu hela, nune’e progresu konstrusaun fíziku atinje 33.0%. Projetu ne’e ho orsamentu $242.358,65.
Jornalista: Vitorino Lopes da Costa
Editóra : Florêncio Miranda Ximenes
