DILI, 02 maiu 2024 (TATOLI)—Reprezentante Programa Dezenvolvimentu Nasaun Unida (PNUD) iha Timor-Leste, Adeline Carrier, hamutuk ho ninia ekipa, hasoru malu ho Ministra Edukasaun, Dulce de Jesus Soares, hodi diskute kona-ba apoia ekipamentu informátika ba eskola tékniku vokasionál sira iha munisípiu tolu hanesan Bobonaro, Manufahi no Manatuto.
“Ohin mai halo diskusaun ho Ministra Edukasaun kona-ba parseria PNUD no ME. Liu-liu fó apoiu ba eskola hamutuk 15 iha munisípiu tolu, ne’ebé foka ba estabelese laboratóriu informátika hanesan fornese komputadór no ekipamentu informátika sira seluk hodi oferese ba eskola iha prosesu aprendizajen. Liu-liu kona-ba digital learning, apreende kona-ba teknolojia informatika, solár panel ne’e ba eskola nomós ko’alia kona-ba potensialidade ba parseria iha futuru, foka ba dijitalizasaun iha eskola,” Adeline Carrier, informa hafoin sorumutuk ho Ministra Edukasaun, iha salaun VIP Ministériu Edukasaun (ME), Vila Verde, kinta ne’e.
Apoia ne’e destina mós ba eskola sekundáriu jerál maibé barak liu ba tékniku vokasionál. Maski nune’e, ekipa sei halo avaliasaun ba eskola 15 ne’e hodi hatene nesesidade, nune’e bainhira hatene ona maka PNUD iha númeru ekipamentu ne’ebé sei fornese.
“Ita-nia parseiru la’o kleur ona no agora atu halo estudu ba eskola 15 hodi identifika nesesidade kona-ba reabilitasaun ne’ebé tenke halo no fornesimentu ekipamentu informátika inklui instalasaun solár panel. Atividade sira-ne’e hotu tenke kompleta iha fulan-dezembru.
Notísia relevante : PNUD entrega medikamentu no ekipamentu saúde ba MS
“Estudu sei hahú iha semana tuir mai bainhira PNUD no ME konkorda ho eskola sira-ne’ebé atu halo estudu ba,” Reprezentante PNUD tenik.
Projetu ne’e hanesan projetu rejionál, ne’ebé nasaun haat inklui Timor-Leste mak benefisia. Projetu ne’e iha parte tolu, PNUD parseria mós ho Ministériu Adminiatraun Estatál (MAE), Ministériu Saúde (MS) no ME, ne’ebé orsamentu espesífika ba ida-ne’e sei fó sai hafoin halo avaliasaun.
PNUD iha futuru sei esplora oportunidade ho doadór sira karik iha tan osan adisionál ne’ebé bele kobre mós eskola sira seluk.
Iha biban hanesan, Ministra Edukasaun, Dulce de Jesus Soares, hateten, ME la’ós foin serbisu hamutuk ho PNUD maibé dezde uluk kedas. Tanba ne’e, apresia ba koopersaun parseria ne’e.
“Governu apresia tebes ba apoiu ida-ne’e, liu-liu ba ita-nia eskola sira-ne’ebé presiza tebes ho limitasaun ne’ebé ita iha, ita presiza kooperasaun ho parseiru sira. Ida-ne’e sira identifika ona 15 eskola, Ministériu Edukasaun sei halo karta ofisiál ida ba hodi konkorda ho eskola sira ne’e hotu no iha mós prosesu ida-ne’e,” Ministra salienta.
Durante diskusaun, parte PNUD hateten katak sira la’os instala de’it, maibé hanesan mós estudante tékniku vokasionál, di’ak liu bele apreende prosesu instalasaun, ne’ebé hnesan parte ida mós sira bele prátika hodi apreende nune’e sira sai husi eskola iha tan abilidade foun ida.
“Ida-ne’e mak ita gosta husi projetu ne’e no sira mós konkorda,” governante ne’e dehan.
Jornalista : Osória Marques
Editora : Julia Chatarina
