DILI, 03 maiu 2024 (TATOLI) – Federasaun Atletizmu Timor-Leste (FATL), sesta ne’e, iha Estádiu Munisipál Dili halo ona abertura ba kampionatu nasionál ne’ebé partisipa husi atleta Munisípiu 13 inklui Rejiaun Administrativa Espesiál Oé-Cusse Ambeno (RAEOA) ho atleta 100-resin.
Atividade ne’e hala’o durante loron rua; hahú ohin no finál iha aban (04/05), nafatin iha Estádiu Munisipál Dili.
Eventu nasionál ne’e loke direita husi Ministru Juventude Desportu Arte no Kultura (MJDAK) Nelyo Isaac Sarmentu no akompaña husi reprezentante Komite Olimpiku Nasionál Timor-Leste (CONTL-sigla portugés), reprezentante Konfederasaun Desportiva Timor-Leste (CDTL-sigla portugés) no federasaun desportiva balun.
“Kampionatu Nasionál ne’e atu halo selesaun ba atleta hodi prepara ba atleta selesaun nasionál. Ita tenke prepara atleta agora atu prepara ba jogu sira internasionál,” Ministru Nelyo hatete iha nia intervensaun.
Iha okaziaun ne’e, nia husu ba treinadór sira, labele iha kampionatu mak partisipa maibé iha munisípiu idaidak nafatin halo preparasaun.
“Treinadór no atleta sira iha Munisípiu imi labele he’in de’it kompetisaun mak imi mai, kompetisaun mak imi treinu, maibé prepara aan nafatin, koordena hamutuk ho autoridade munisípiu sira. Fila ba buka meiu nafatin halo treinamentu, atu ba oin imi bele sai atleta ne’ebé diak,” Governante ne’e enkoraja.
Iha fatin hanesan, Prezidente FATL Afrânio Xavier Amaral, hateten, objetivu kampionatu nasionál ne’e atu prepara atleta sira ba jogu internasionál tolu.
“Kampionatu ida-ne’e mak ita foin halo selesaun ba atleta sira hodi haree sira-nia prestasaun merese ka la’e kompete iha jogu internasionál sira. Kampionatu ida-ne’e prepara mós ba jogu tolu; ida mak CPLP, ida mak ASEAN University Games Surabaya no jogu Olimpiku ne’ebé sei akontese tinan ne’e,” Afrânio dehan.
Iha abertura ne’e atleta sira konsege kurrida uluk iha metru 800 no 1500, maibé finál hodi termina se mak sai primeiru lugar, segundu lugar no terseiru lugar iha aban sábadu (04/05) dadeer tuku 06:00 otl iha Estádiu Dili.
Eventu ne’e hala’o tanba hetan apoiu másimu orsamentu husi MJDAK ho montante $22.000. Orsamentu ne’e aloka ba preparasaun, premiu ba atleta, medalla lojístika no seluktan.
Jornalista: Hortencio Sanchez
Editór: Rafael Ximenes de A. Belo
