CRS-FKHK lansa programa HAKOREN hodi prevene risku dezastre naturál
VIQUEQUE, 03 maiu 2024 (TATOLI)-Organizasaun Internasionál Catholic Relief Services (CRS, sigla Inglés) ho organizasaun lokál Fundasaun Knua Haberan Komunidade (FKHK) hamutuk autoridade munisípiu Viqueque , sesta ne’e, lansa projetu Haforsa Komunidade Rezilénsia (HAKOREN) hodi prevene ka responde alterasaun mudanda klimátika iha munisípiu Viqueque.
Projetu HAKOREN ne’e ba faze daruak ne’e CRS serbisu hamutuk ho FKHK ba implementa iha suku tarjetu hamutuk ualu durante tinan-tolu.
“Ho projetu HAKOREN ida-ne’e suporta husi ami-nia doador iha Amérika, ne’ebé ba faze dauluk ami implementa iha Viqueque no agora ba faze daruak mós iha Viqueque hodi apoiu ba prevensaun risku dezastre naturál “, Diretór CRS, Yane T. Pinto, hateten iha serimónia lasamentu programa HAKOREN, iha salaun Protesaun Sivil, Beloi, ohin.
Projetu Hakoren ninia serbisu umanitária ho objetivu atu responde ba situasaun dezastre sira hanesan inundasaun, bailoron naruk, rai monu, rai halai sira-ne’ebé iha munisípiu Viqueque.
“Ita hotu aseita katak labele fó impaktu ba ema nia vida. Tanba ne’e maka CRS hakarak implementa projetu HAKOREN , ami-nia prespetiva katak atu responde ba situasaun dezastre sira. Nune’e presiza metode ida hodi halo prosimasaun reziliente no inkluzivu bainhira ita fó resposta ba situasaun emerjénsia sira. Ita mós tama konta ba nesesidade báziku ba grupu feto, ema ho difisiénsia, idozu nomós labarik sira ida-ne’e maka ami sei implementa faze daruak”, katak nian.
CRS sei implementa programa haforsa sistema, preparasaun, mitigasaun ba risku dezastre sira ne’ebé akontese iha munisípiu ida-ne’e no servisu hamutuk ho autoridade lokál no parte relevante sira.
“Ami mós agradese ba autoridade sira ne’ebé simu ami hodi implementa programa iha suku 8 ne’e sai tarjetu ba CRS, atu ita hamutuk hodi komtribui ba dezastre naturál sira”, nia realsa.
Iha fatin hanesan, Sekretáriu Munisípiu Viqueque asuntu Sosiál no organizasaun komunitária, Acacio de Sousa, agradese ba CRS ne’ebé implementa programa referidu hodi ajuda komunidade sira-ne’ebé enfrenta dezastre naturál.
“Ha’u husu organizasaun CRS no FKHK la’o nafatin ba oin, atu ita bele servisu hamutuk iha situasaun sira-ne’ebé ita-nia komunidade hasoru liuliu iha tempu dezastre naturál”, nia agradese.
Kona-ba projetu HAKOREN ne’e, atividade tulo maka hanesan apoiu suku ba redusaun risku dezastre, rai no impresta osan ba komunidade, atividade agrikultura liuliu iha área ortikultura.
Projetu Hakoren ne’e sei implementa iha postu Viqueque Vila suku tolu hanesan Suku Caraubalo, Bahalara Uain, postu Ossu suku tarjetu mak hanesan suku Uaibobo, Uagia, Nahareka no suku Liaruka no postu Lacluta maka hanesan suku Dilór no suku Laline.
Enkuantu, projetu HAKOREN faze dahuluk iha postu tolu iha Viqueque mak hanesan Ossu no Lacluta ho tipu atividade hanesan apoiu formasaun, rai no impresta osan no atividade ortikultuta.
Iha fatin hanesan Diretór F-KHK, Agusto Pinto, haktuir, projetu HAKOREN ba faze dahuluk implementa postu tolu no ba faze daruak nafatin iha postu tolu, maibé alarga ba suku seluk.
“Ami nafatin husu apoiu ba autoridade lokál sira hodi kolabora ho ami, atu ami implementa projetu ho la’o di’ak. Atu ita hamutuk hodi lori Viqueque ba oin”, nia salienta.
Iha lansamentu programa HAKOREN ne’e hetan partisipa husi autoridade lokál, Prezidente Kamara Komersiu Industria (CCI, sigla portugés) munisípiu Viqueque no ekipA CRS no F-KHK.
Jornalista: Vitorino Lopes da Costa
Editór : Florêncio Miranda Ximenes
