iklan

POLÍTIKA

PN enkoraja timoroan kontinua aprende dalen portugés

PN enkoraja timoroan kontinua aprende dalen portugés

Deputadu membru Komisaun B, Luís Roberto da Silva. Imajen/Tatoli

DILI, 03 maiu 2024 (TATOLI)—Parlamentu Nasionál (PN) enkoraja timoroan kontinua aprende dalen portugés loro-loron no felisita povu nasaun luzofóna iha ámbitu komemorasaun loron mundiál Língua Portugeza ne’ebé sei komemora kada tinan iha 05 maiu.

Deputadu KHUNTO, Luís Roberto, hateten tuir konstituisaun dalen portugés no tetun sai hanesan lian ofisiál Timor-Leste (TL) nian, nune’e enkoraja timoroan hotu atu aprende portugés hodi kontribui ba dezenvolvimentu nasaun.

“Kuaze ami foinsa’e sira maiória iha Parlamentu ne’e ladún hatene kle’an portugés, maibé ami hakaas aan nafatin hodi aprende portugés nu’udar lian ofisiál ita-nia nasaun nian. Mensajen ba timoroan tomak, esforsu aan estuda no ko’alia lian portugés,” nia hateten ba Agência Tatoli iha resintu Parlamentu Nasionál, sesta ne’e.

Nia husu ba Ministériu Edukasaun (ME) atu estabelese tan eskola eskola CAFE iha postu administrativu sira hodi promove liután lian portugés iha prosesu ensinu aprendizajen, tanba ho estabelesimentu eskola CAFE durante ne’e la’o ona no ida-ne´e importante tebes.

Vise Prezidente Komisaun G trata asuntu Edukasaun, Juventude, Kultura no Sidadania, Deputadu Gabriel Soares, hateten dalen portugés sai nu’udar matadalan ba luta rezisténsia TL nian, nune’e apresia dalen ne’e sai ita-nia indentidade prinsipál.

Tanba, nia dehan, dalen portugés la’ós foin mak dezenvolve agora maibé hahú kedas husi tempu rezisténsia hodi halo komunikasaun verbál ka eskrita no hakerek karta ruma.

Tan ne’e ba komemorasaun tinan ne’e importante tebes ba povu Timor-Leste, portugés mós sai ona utilizasaun ho konvivénsia ho lian tetun, nune’e atu kontinua aprende.

Iha kuríkulu Ministériu Edukasaun (ME) dalen portugés hanesan lian instrusaun, maibé realidade estudante sira seidauk aproveita tempu ho di’ak atu aprende, nune’e daudaun estudante sira barak mak seidauk ko’alia protugés ho di’ak.

Entaun, tuir nia, iha ambiente sai fatór importante oinsá atu dudu dezenvolvimentu labarik ida ko´alia lian portugés, ho ida-ne’e enkoraja timoroan hotu atu kontinua aprende nafatin.

“Nune’e, rekomenda liuliu ba estudante sira katak seidauk tarde atu nafatin aprende portugés ne’e importante. Presiza ita aprende barak liután, liuliu ba ita-nia estudante no funsionáriu sira,” nian dehan.

Jornalista : Nelson de Sousa

Editór         : Cancio Ximenes

iklan
iklan

Leave a Reply

iklan
error: Content is protected !!