iklan

COVALIMA

Administradór postu Fatululik orienta komunidade hadi’a estrada aat iha Fatuluro

Administradór postu Fatululik orienta komunidade hadi’a estrada aat iha Fatuluro

Administradór postu administrativu Fatululik, Elias da Cruz, fó orientasaun ba xefe aldeia atu halo limpeza foku hodi hadi’a estrada hosi aldeia Fatuloro liga ba aldeia Makous, tanba kondisaun estrada aat hodi difikulta movimentu transporte ba-mai, sábadu (04 maiu 2024). Imajen/Espesiál.

COVALIMA, 04 maiu 2024 (TATOLI)–Administradór postu administrativu Fatululik, Elias da Cruz, fó orientasaun ba xefe aldeia atu haruka komunidade halo limpeza foku hodi hadi’a estrada hosi aldeia Fatuloro liga ba aldeia Makous, tanba kondisaun estrada aat hodi difikulta movimentu transporte ba-mai.

Nia dehan, estrada husi aldeia Fatuloro liga ba iha kapitál postu tama ona lista prosesu konkursu públiku husi suku Dato-Tolu, postu Fohorem liga ba suku Taroman, postu Fatululik ho kilometru 10 aprova ona maibé seidauk anúnsia nia rezultadu.

“Ha’u sei manda karta ida atu husu prosesu konkursu públiku estrada nian bainhira mak atu hahú implementa, tanba tama iha planu prióridade nivél postu kondisaun estrada agora difikulta movimentu transporte,” Administradór postu administrativu Fatululik, Elias da Cruz, hateten ba Agência Tatoli iha aldeia Makous, suku Taroman, postu administrative Fatululik, munisípiu Covalima, sábadu ne´e.

Xefe aldeia Fatuloro, Bernadino Noronha, hateten komunidade aldeia Holba no Makous hala’o limpeza hodi hadi’a estrada diresaun Fatuloro hola inisiativa hadi´a estrada iha bairru Hurgele, aldeia Makous, suku Taroman.

Kondisaun estrada husi aldeia Fatuloro liga ba postu administrativu Fatululik no liga ba kapitál munisípiu Covalima, iha tempu udan ne´e difikulta tebes movimentu transporte públiku no privadu sira.

Tanba estrada aat, nia hateten, funsionáriu públiku balun ba halo servisu iha edifísiu postu administrative Fatululik ne’e sira la’o ain de’it ho distánasia maizumenus kilometru rua (2)-resin.

“Ami halo limpeza hodi hadi’a estrada tanba simu orientasaun hosi administradór postu administrativu bazeia ba dekretu Governu númeru 8/2019 kona-ba hala’o limpeza,” Bernadino Noronha, hateten ba Agência Tatoli iha aldeia Fatuloro, sábadu ne’e

Administradór fó orientasaun ba xefe aldeia tanba haree ba kondisaun estrada aat no grave tebes, ne´ebé difikulta movimentu transporte públika no funsionáriu balun hosi aldeia Fatuloro ba servisu iha postu administrative ne´e sira la’o ain de’it tanba estrada aat.

Orsamentu Jerál Estadu tinan 2024 ba munisípiu Covalima hamutuk $7.256, 651, no husi orsamentu ne’e verba ba postu administrativu hitu (7) hamutuk $ 601.706 no aloka orsamentu ba postu administrativu Fatululik hamutuk $103.026,747.

Jornalista : Celestina Teles

Editór        : Cancio Ximenes

iklan
iklan

Leave a Reply

iklan
error: Content is protected !!