VIQUEQUE, 05 maiu 2024 (TATOLI)-Udan-boot iha semana ne’e rezulta negosiante José Amaral (67) lakon vida tanba mota boot tún derrepente bainhira hala’o hela viajen hosi postu administrativu Lakluta, munísipiu Viqueque, atu ba fa’an produtu lokál iha merkadu tradisionál Kairui, munísipiu Manatuto.
Matebian orijen hosi aldeia Tula-Oli, suku Dilór, Postu Administrativu Lacluta, Munisípiu Viqueque lakon vida.
“Suku Dilór lakon ami-nia abitante ida-ne’ebé atu ba fa’an produtu lokál iha merkadu Kairui, postu Laleia, munisípiu Manatuto, maibé la konsege to’o iha merkadu, mota Uaimori lori tiha inklui matebian nia kuda ne’ebé lalin ninia modo tahan no naha ne’ebé tula iha kuda leten,” Xefe suku Dilór, Jacinto Ximenes, informa ba Agência TATOLI liuhosi telefónika, domingu ne’e.
Xefe suku Dilór ne’e konta, negosiante José Amaral rezidénsia atuál iha Bobomete, Maubai.
Ne’e duni iha loron-kinta (01/05) maizumenus tuku 3h30 lokraik, vítima lori produtu lokál atu ba fa’an iha merkadu Kairui. Maibé, metebian la’o to’o iha natar Malilae.
Iha momentu ne’e matebian tama ona mota Uaimori nian klaran maka akontese udan-boot, depois mota boot tún derrepente de’it, halo matebian esforsu-aan hakarak halai bá iha rai maran, maibé korrente mota boot entaun la biban sai no mota kontinua lulun matebian to’o iis kotu inklui kuda ne’ebé nia tula produtu lokál.
“Nune’e horisehik família sira hosi matebian ba buka matebian hetan uluk matebian nia kuda ne’ebé matebian tula sasán no ohin maka família sira hetan fali matebian ninia isin mate ne’ebé latan iha mota klaran. Daudaun ne’e matebian ninia isin mate asegura ona iha eskuadra Polísia Nasionál Timor Leste (PNTL) postu Laleia hafoin halo transferensia ba família sira,” Xefe suku Dilór esplika.
Enkuantu, daudaun ne’e família sira halo hela prosesu preparasaun lori mate isin ba tau iha Kairui, Manatuto. Prosesu ne’e Autoridade Protesaun Sivíl (APC, sigla portugés) maka sei entrega APC munisípiu Viqueque no ba família sira hodi lori mate isin bá ninia rezidénsia atuál suku Dilór hodi halo prosesu fúnebre.
Matebian José Amaral nu’udar negosiante ida-ne’ebé durante ne’e fa’an ninia produtu lokál iha merkadu tradisionál Kairui no matebian husik ninia feen no oan hamutuk na’in tolu.
Jornalista: Vitorino Lopes da Costa
Editór : Evaristo Soares Martins