VIQUEQUE, 05 maiu 2024 (TATOLI)-Akontese udan-boot iha loron sábadu (04/05) hodi rezulta ponte Metauai diresaun Uatucarbau bá munisípiu Viqueque kotu totál hodi difikulta movimentu ema no transporte bá-mai.
“Udan boot afeta ba ponte Metauai ne’ebé baliza postu Uatulari no Uatucarbau kotu totál, nune’e daudaun transporte husi Uatucarbau no husi Viqueque sa’e mai mós liu ladi’ak tanba kotu totál”, Administradór Postu administrativu Uatucarbau, Anacleto Doutel Sarmento, hateten ba Agência Tatoli, via telefónika, ohin.
Ho akontesementu ne’e autoridade postu Uatucarbau halo ona koordenasaun ho MAPPF hodi lori ekipamentu pezadu ba para iha suku Vessoru Postu Uatulari, maibé operadór ba eskavator sei iha Dili.
“Ho nune’e, ami seidauk halo normalziasaun ba ponte Metauai ne’ebé kotu, nune’e abitante sira labele halo movimentu bá-mai”, Anacleto haktuir.
Autoridade ne’e konta, ponte Metauai iha tempu udan kotu bei-beik, la’ós foin maka kotu, nune’e bainhira kotu sempre fó impaktu ba transporte hotu inklui abitante sira iha postu Uatucarbau sira-ne’ebé bá munisípiu Viqueque.
“Tanba ne’e ha’u hakarak hato’o ba Governu atu tau atensaun ba ponte no Estrada sira-ne’ebé sempre fó impedementu ba ita-nia povu sira-ne’e. Atu nune’e labele difikulta ba abitante sira ba munisípiu no negosiante sira bele lori sira-nia produtu lokál bá merkadu”. Nia hato’o.
Jornalista: Vitorino Lopes da Costa
Editór : Florencio Miranda Ximenes
