COVALIMA, 05 Maiu 2024 (TATOLI) – Administradór Postu Administrativu Fatululik, Elias da Cruz fó prioridade promove turizmu komunitária lagoa Mauwan ne’ebé lokaliza iha aldeia Lia-nain, suku Taroman, postu Fatululik, munisípiu Covalima.
“Lagoa Mauwan hanesan fatin turizmu komunitáriu iha postu Fatululik, ita presiza dezenvolve nune’e bele atrai turista sira ba vizita, ha’u hamutuk ho funsionáriu vizita no halo ona limpeza atu loke estrada,” lidér postu Fatululik, Elias da Cruz , dehan ba Tatoli, iha nia rezidénsia Fatululik, domingu ne’e.
Setór turizmu nu’udar rekursu produtivu no poténsia ekonómiku ne’ebé boot hodi esploka ho didi’ak atu hasa’e kresimentu ekonomia.
Fatin turizmu komunitáriu iha Fatululik la’ós lagoa Mauwan de’it, iha mós fatin sira seluk hanesan; air terjung jele, foho Taroman no seluk tan, maibé fó prioridade dezenvolve uluk lagoa Mauwan.
Administradór ne’e, dehan, loloos hahú ateru ona estrada hosi aldeia lian-na’in liga ba to’o iha lagoa Mauwan tanba daudaun ne’e haree ba klima sei udan.
Orsamentu Jerál Estadu tinan 2024 ba munisípiu Covalima hamutuk $7,256.651, hosi orsamentu ne’e verba ba postu administrativu hitu hamutuk $601.706.
Hosi orsamentu ne’e aloka ba postu administrativu Fatululik hamutuk $103.026,747.
Tuir dadus iha tinan 2023 ne’e, Servisu Munisipál Jestaun Turizmu, identifika ona turismu komunitáriu, kulturál no rejiozu ne’ebé eziste iha postu administrativu hitu, munisípiu Covalima.
Iha Postu Fatululik identifika fatin turizmu haat hanesan; turizmu kulturál natureza foho Taroman, foho motfor, liurai tolu nia fatin no edifísiu antiga postu Administrativu.
Hosi parte Maucatar hanesan; foho Lakirin ho Sadan Lulik. Iha postu administrativu Fohorem hanesan; turizmu natureza, lagoa Lokon Kora, turizmu istóriku 12 de setembru, turizmu relijiozu kruz motor no edifísiu antiga postu administrativu Fohorem.
Iha postu Zumalai hanesan; turizmu komunitára Wetudak bet, tasi ibun Kulu-oan, Sala Asa lokaliza iha suku Lour.
Hosi fatin turizmu 18 ne’ebé identifika nee, iha fatin turizmu 12 maka halo ona promosaun bainhira hala’o atividade feira iha Covalima no fatin turizmu 6 maka seidauk halo promosaun hanesan; iha postu administrativu Tilomar Lagoa beku laran, pura gali no tasi ibun Salele ne’ebé rua seluk la lembra ona.
Jornalista: Celestina Teles
Editór: Evaristo Soares Martins