DILI, 06 Maiu 2024 (TATOLI) – Ministériu Agrikultura, Pekuária, Peska no Floresta (MAPPF) foin ezekuta 10,9% ka ekivale ba millaun $12-resin, husi totál orsamentu millaun $30,7.
Diretór-Jerál Servisu Korporativu MAPPF, Rufino Soares Gusmão, informa katak husi totál orsamentu ne’ebé iha, kompromisu hamutuk millaun $8,9, obrigasaun $244.833,72, atuál $3,1 no balansu $18,4.
“Iha primeiru trimestre ne’e foin maka ezekuta ba pagamentu saláriu funsionáriu sira-nian, pagamentu ba MOP, inklui ezekusaun ba atividade operasionál sira ne’ebé ministériu hala’o kada loron. Tanba ne’e, foin atinje 10,9%”, Rufino Gusmão hateten iha Comoro, ohin.
Iha segundu trimestre ne’e, ministériu halo ona esforsu atu aselera ezekusaun ba 45%, nune’e bele garante orsamentu ne’ebé iha ezekuta tuir planu no programa ne’ebé trasa ona. Tanba verba ne’ebé aloka ona ne’e atu apoia programa haat iha área agrikultura, peska, pekuária no floresta.
“Ita iha setór haat ne’ebé importante no sira-nia proposta sei iha hela prosesu aprovizionamentu pur volta millaun $8-resin ne’ebé submete ona iha primeiru trimestre no agora prepara ona atu tama ba konkursu públiku. Agora, iha segundu trimestre ne’e kuaze proposta orsamentu millaun $5 maka prosesa ona. Espera katak ho proposta ne’ebé iha, segundu trimestre ne’e sei garante ezekusaun di’ak liután”, nia esplika.
Totál orsamentu MAPPF millaun $30,7 ne’e aloka ba saláriu no vensimentu millaun $9,4, bens no servisu millaun $9,3, transferénsia públika $459.007, kapitál menór millaun $4,8 no kapitál dezenvolvimentu millaun $6,7.
Notísia relevante: OJE 2024: MAPPF prevee millaun $30.694 prioriza aumenta produsaun iha rai-laran
Jornalista: Tomé Amado
Editora: Maria Auxiliadora
