OÉ-CUSSE, 06 maiu 2024 (TATOLI) – Prezidente Autoridade interinu iha Rejiaun Administrativa Espesiál Oé-Cusse Ambeno (RAEOA), André La’o, husu funsionáriu públiku sira iha Oé-Cusse atu disiplina no responsabilidade iha serbisu fatin hodi kontribui hadi’a administrasaun públika.
Notísia relevante:Autoridade RAEOA aloka rihun $37 komemora 20 Maiu ho desportu komunitária
André La’o, hato’o nia apelu ne’e, iha ámbitu serimónia hasa’e bandeira nasionál nian, iha kampu futeból Oébau Oé-Cusse, segunda ne’e.
“Ohin ita hahú hala’o ita-nia programa iha RAEOA nian, kona-bá ichar bandeira nasionál, tanba ne’e liuhusi biban ne’e, ha’u husu ita-nia disiplina no tane’e aas ita-nia responsabilidade nu’udar timoroan, no serbí ita-nia komunidade ho ezemplu ne’ebé di’ak atu banati tuir, iha serbisu fatin, ha’u enkoraja funsionáriu sira hotu, atu serbí no pasiénsia no responsabilidade ho kualidade hodi fó atendimentu di’ak ba públiku, ida-ne’e mak ita-nia devér,” membru autoridade RAEOA ne’e husu.
Sekretáriu Rejionál ba Asuntu Administrasaun ne’e, agradese komandante PNTL Oé-Cusse, tanba ho vontade hodi hahú inisia ichar bandeira nasionál ein-konjunta kada fulan, iha semana dahuluk nian, hodi fó hanoin nafatin responsabilidade ho obrigasaun nu’udar timoroan.
“Ami husu ba ita hotu, hahú ohin ba oin atu tau responsabilidade no disiplina, atu sai sasukat ida ba ita atu hatene ita-nia nasionalismu no patriotizmu ba nasaun no povu ida-ne’e,” nia afirma.
Nia husu hotu kada fulan presiza hala’o isar bandeira nasionál iha semana dahuluk, atu idak-idak hatudu nia dedikasaun, responsabilidade hanesan timoroan, hanesan funsionáriu, hanesan estudante no hanesan seguransa nasaun nian.
“Ita mak sai ezemplu ba ita-nia povu, tan ne’e ami husu atu hatuur ita-nia disiplina, fulan oin mai tuku 08:00 dadeersan, hotu-hotu iha ne’e ona, ne’e hatudu ita-nia disiplina,” nia fó hanoin.
Notísia relevante: RAEOA kria komisaun lansa Aero Dili iha 19 maiu husi PM Xanana
Jornalista: Abílio Elo Nini
Editór: Evaristo Soares Martins
