iklan

DESPORTU, HEADLINE

Jovanio Silva lori Taibessi FC manán Daudere FC 4-2

Jovanio Silva lori Taibessi FC manán Daudere FC 4-2

Jogu Futebol Kopa Maun Boot Kayrala Xanana Gusmão 2024, Daudere F.C kontra Taibessi F.C, iha estadiun Munisípal Dili, segunda (06/05). Imajen Tatoli/Francisco Sony

DILI, 06 abríl 2024 (TATOLI) – Jogadór husi ekipa Taibessi FC, Jovanio Silva (9), susesu lori nia klube manán Daudere FC ho rezultadu 4-2 bainhira hatama golu haat, iha jogu kontinuasaun kopa Maun Boot Kay Rala Xanana Gusmão, ne’ebé realiza iha Estádiu Munisipál Dili, segunda ne’e.

Bainhira árbitru deside jogu la’o iha minutu primeira parte iha kampu laran, jogadór ekipa rua lansa kedan kontra no atake ba malu tuir ritmu idaidak nian ho objetivu hatama golu.

Jogu Futebol Kopa Maun Boot Kayrala Xanana Gusmão 2024, Daudere F.C kontra Taibessi F.C, iha estadiun Munisípal Dili, segunda (06/05). Imajen Tatoli/Francisco Sony

Iha kontra atake ne’e, jogadór sira hatudu abilidade nu’udar jogadór profesionál. Daudere halo kontra atake ne’ebé makas halo jogadór Taibessi laiha konsentrasaun, maibé Guarda Rede Taibessi tenta salva tutuir bola.

Haree ba ekipa Daudere domina liu bola treinadór Taibessi halo mudansa urjente ba estratejia jogu atu nune’e bele hamate atake ne’ebé jogadór Daudere lansa.

Mudansa ne’e la hela de’it hanesan mudansa tanba iha minutu 11, jogadór Jovanio Silva,  lansa ona golu primeiru hodi muda rezultadu ba 1-0. Golu ne’e halo ekipa Daudere ho nia adeptu sira sente lamenta no hakilar ho lian makas, maibé jogu kontinua la’o nafatin no vitória provizóriu hela ho Taibessi.

Daudere halo servisu ne’ebé makas tebes. Servisu hirak ne’e hela de’it ho naran tanba la rezulta golu. Tanba minutu 45 termina ona árbitru deside hapara jogu hodi deskansa minutu 15 hafoin kontinua fali.

Iha segunda parte, ekipa rua kontinua halo kontra no atake ba malu ho velosiade ne’ebé makas, anima tebes adeptu sira husi ekipa rua nian.

Jogu Futebol Kopa Maun Boot Kayrala Xanana Gusmão 2024, Daudere F.C kontra Taibessi F.C, iha estadiun Munisípal Dili, segunda (06/05). Imajen Tatoli/Francisco Sony

Iha segunda parte ne’e, Daudere halo esforsu ne’ebé másimu ikus hatudu rezultadu pozitivu tanba iha minutu 55, jogadór Adu Namiruru (7), konsege lees rede Taibessi muda rezultadu ba 1-1.

Husi rezultadu ne’e hadau hikas vontade Daudere nian hodi hala’o jogu maibé Taibessi mantein iha pozisaun hodi hamate tutuir atake ne’ebé Daudere halo no atake kontra Daudere. Atake ne’ebé Taibessi halo la hela de’it hanesan atake, maibé fó rezultadu di’ak tanba iha minutu 57, jogadór Jevanio kontinua hatudu nia forsa hodi halo tan golu ida muda rezultadu ba 2-1.

Golu ne’e halo Daudere sente la konfortavel. Tenke hakas aan makas liután. Tenke esforsu atu hamate jogu Taibessi nian. Maibé esforsu sira hela de’it hanesan esforsu tanba Taibessi domina liutan jogu.

Jogu la’o to’o minutu 63, defeza Daudere komete erru hasoru avansadu Taibessi iha kedan lina oin Daudere nian. Erru ne’e fó biban ba árbitru foti desizaun hodi fó penalidade ba Taibessi. Iha penalidade jogadór Taibessi tenke halo sutu livre tuir regulamentu futeból ne’ebé hasai husi Federation International Football Federation Assosiation (FIFA).

Sutu livre ne’e ezekuta husi jogadór Jevanio. Iha sutu ne’e halo Guarda Rede Daudere nian halai sala no bola tama liu ba rede laran, rezultadu muda kedan ba 3-1.

Jogu Futebol Kopa Maun Boot Kayrala Xanana Gusmão 2024, Daudere F.C kontra Taibessi F.C, iha estadiun Munisípal Dili, segunda (06/05). Imajen Tatoli/Francisco Sony

Golu ne’e fó ksolok tebes adeptu sira no jogadór Taibessi nian. Golu ne’e mós fó tristeza ba adeptu no jogadór Daudere nian tanba laiha ona kbi’it atu manán jogu ne’e.

Maske nune’e Daudere nafatin esforsu hatudu nafatin jogu bonitu, iha minutu 67, Daudare hetan oportuniade husi jogadór, Alexandrino Miranda (17), bainhira bola barullu iha lina oin Taibessi nian jogadór ne’e lansa kedan sutu ida kona liu iha alvu muda rezultadu ba 3-2.

Husi golu ne’e halo Taibessi tenke servisu makas tanba fó amesa ba sira atu bele empata, ho nune’e jogadór sira hakas aan makas ikus iha minutu 70, jogadór Jovanio lansa tan golu ikus muda rezultadu metin ba 4-2. Golu ikus ne’e hanesan golu vitória ba Taibessi hodi fila ho kontente no Daudere tenke fila ho tristeza hodi hein fali jogu seluk tuir mai iha tempu seluk.

Notísia relevante: Klube Zhavia FC empata ho Pilatus Buruma FC iha jogu kopa Xanana

Jornalista: Hortencio Sanchez

Editór Florencio Miranda Ximenes 

iklan
iklan

Leave a Reply

iklan
error: Content is protected !!