DILI, 06 Maiu 2024 (TATOLI) – Ministru Agrikultura, Pekuária, Peska no Floresta (MAPPF), Marcos da Cruz, no dirijente sira hahú diskute planu no programa prioridade ba 2025 nian ne’ebé kontinua tau importánsia ba hasa’e produsaun agríkola, pekuária, peska no floresta iha rai-laran.
Ministru informa katak kalendáriu diskusaun planu no atividade orsamentál 2025 nian Ministériu Finansa entrega ona ba MAPPF iha Marsu atu halo ona preparativu sira, tanba ne’e diskusaun ne’ebé realiza ohin, diresaun idaidak aprezenta sira-nia planu no atividade sira inklui ho estimativa orsamentu sira, nune’e bele submete fali ba Finansa iha 10 Maiu.
“Ha’u husu ba dirijente sira hotu atu halo diskusaun ne’e tenke bazeia ba programa no atividade. Tenke haree didi’ak planu no atividade sira ne’e bainhira iha 10 Maiu ita submete ba Ministériu Finansa labele iha problema”, governante ne’e dehan iha salaun enkontru MAPPF, Comoro, ohin.
Marcos da Cruz adianta katak programa prioridade 2025 nian ne’ebé ministériu, liuhusi kada diresaun sira diskute ne’e foku nafatin ba programa iha área importante haat ne’ebé planeia ona iha tinan ida ne’e. “Iha área agrikultura nian mak tenke hasa’e produsaun hare no batar, iha setór pekuáriu hasa’e produsaun animál, tau-matan ba animál sira labele hetan moras, inklui reforsa mós produsaun karau susun-been, nune’e iha tinan oin bele iha ona rezultadu”, salienta.
Aleinde ne’e, dezenvolve mós área peska, liuliu iha akikultura atu kontinua prodús ikan oan barak hodi fornese ba ema hotu bele haki’ak, nune’e bele garante kada ema ida bele han ikan kada loron kilógrama 10 hodi hadi’a nutrisaun ema hotu iha nasaun.
Foku importante seluk mak reforsa mós área floresta, liuliu halo kontrolu maka’as ba komunidade sira ne’ebé tesi no fa’an ai-ilegál, nune’e bele trava atividade sira ne’ebé la kontribui ba dezenvolvimentu nasaun nian no kontinua kuda ai iha territóriu.
“Tanba ne’e, buka atu halo diskusaun ida ho di’ak liután. Kada diresaun bele aprezenta idaidak ninia planu no atividade, nune’e bele ajusta hamutuk iha planu ministériu nian hodi submete ba Ministériu Finansa. Bazeia ba observasaun ne’ebé halo iha baze, planu no atividade sira ajusta atu solusiona problema ne’ebé ita hasoru iha 2024 ne’e”, dehan.
Nune’e, bainhira planu ne’ebé aprezenta ona iha diskusaun ne’e pertinente duni maka sei enkaixa iha orsamentu tuir idaidak nian no bainhira ministériu lori bá diskute iha Ministériu Finansa bele konvense Komisaun Revizaun Orsamentu Polítiku 2025.
Diretór Nasionál Ortikultura, Lúcio Ramiro Ribeiro, garante katak produsaun ba tinan ida ne’e, liuliu hare no batar sei hatudu rezultadu di’ak, nune’e planu no atividade alternativa atu hasa’e tan produsaun iha rai-laran ba 2025 ne’e maka sei reativa hotu natar sira ne’ebé seidauk funsiona, nune’e bele hasa’e produsaun.
“Ita iha ona estimativa orsamentu ba 2025 nian, maibé ha’u seidauk bele hateten tanba ida ne’e sei iha faze diskusaun nia laran. Bainhira planu no atividade ne’e hetan ona aseitasaun inklui ninia orsamentu sira maka ha’u sei informa”, realsa.
Notísia relevante: MAPPF diskute preparativu ba orsamentu 2025 iha kada diresaun
Jornalista: Tomé Amado
Editora: Maria Auxiliadora
