DILI, 07 maiu 2024 (TATOLI)—Ministru Komérsiu no Indústria (MCI), Filipus Nino Pereira, iha ámbitu abertura ba Kafé Uma Luhu, emkoraja joven sira atu brani foti risku, atu halo atividade emprendedorizmu.
“Ita ko’alia kona-ba emprendedorizmu mak ida-ne’e ita brani foti risku halo negósiu, tanba negósiu iha buat rua, manan ou lakon. Se ita halo jestaun no promosaun di’ak no prepara ita-nia produtu ho kualidade ne’e ita sei manan, maibé banhira ita jestaun la di’ak ita laiha transparánsia ba malu mak ita sei lakon,” Filipus Nino Pereira informa bainhira halo abertura ba Kafé Uma luhu iha Delta Nova, ohin.
Governante hateten, atividade ekonomia sira hanesan ne’e tulun no kontribui ba dezenvolvimentu ekonomia iha rai-laran no kontribui redusaun númeru dezempregu iha TL.
“Atividade ekonomia sira ne’e ita halo negósiu kulinária hanesan hahan no kafetária buat sira ne’e tulun no kontribui mós ba dezenvolvimentu ekonomia nian, liuliu mak iha mikro-ekonomia, tanba ita halo negósiu ita injeta kapitál, ita loke mós kampu traballu ba ita-nia maluk sira ne’ebé mak servisu laiha, signifika ita kontribui mós ba redusaun ba númeru dezempregu,” nia informa.
Membru governu ne’e enkoraja joven sira atu iha vontade no espiritu emprendedorizmu maske lukru ki’ik maibé nia signifikativu ne’e boot.“Ita hakarak matenek ne’ebé mak iha, presiza kanaliza ba atividade produtivu sira”.
Iha fatin hanesan, Reprezentante Sinema Café, Vasco Ribeiro, agradese MCI tanba marka prezensa iha sira-nia fatin, hodi halo abertura ba sira-nia kafetária.
“Ami orgullu tebes ba loron ohin ne’ebé marka istória ba ami joven. Ami koko ami-nia inisativu no kreativu ida-ne’e hodi la’o ba oin, maske hasoru dezafiu sira, maibé labele rende uluk, koko foin sente nia vantajen no desvantajen sira,” Vasco Ribeiro konklui.
Jornalista: Felicidade Ximenes
Editór: Rafael Ximenes de A. Belo
