Mota Saketu ameasa natar ektare 100 iha Macadique
VIQUEQUE, 07 maiu 2023 (TATOLI) – Xefe Suku Macadique, Postu Administrativu Uatulari, Munisipiu Viqueque, Afonso de Reis, informa, udan-boot provoka korente bee sa’e maka’as iha mota Saketu hodi fó ameasa atu sobu povu agrikutór sira-nia natar ektare 100 tanba laiha morru protesaun.
“Udan-boot agora ne’e mota Saketu bee sa’e maka’as atu estraga ha’u-nia agrikultór sira-nia natar, horiseik agrikultór sira fó-hatene ha’u ba haree rasik, katak mota atu sobu ona natar sira-ne’e. Ida-ne’e presiza intervensaun sedu se la’e iha epoka ida-ne’e natar sira-ne’e mota sobu hotu”, Xefe suku Afonso de Reis, hateten ba Agência TATOLI , ohin.
Autoridade suku Macadique ne’e, husu Ministériu Agrikultura, Pekuária, Peska no Floresta (MAPPF) atu responde urjente nune’e mota labele estraga agrikultór sira-nia natar.
“Iha tinan 2023 mota Saketu estraga uluk ona natar ektare 14 iha área Bee-moris, ami hato’o ba Governu, maibé la halo normalizasaun, nune’e daudaun ameasa tan tanba laiha morru portesaun. Karik la halo intervensaun povu agrikultór sira sei halerik ba ai-han iha epoka ida-ne’e”, nia afirma.
Governu presiza tau planu hodi konstrui ona morru protesaun ba komunidade nia natar hirak ne’e.
“Ha’u sente iha epoka ida-ne’e udan been di’ak, tanba natar sira iha tinan 2022 abandona kuaze ektare 200, mas agora daudaun ita-nia agrikultór sira halo fali ona, maibé mota maka agora sai fali amesadu ba natar sira-ne’e”, nia preokupa.
Tuir dadús natar iha suku Macadique totál hamutuk ektare 669 hosi númeru ne’e ektare 100 sai ameasa ba mota. Enkuantu husi natar sira-ne’e fó benefísia ba populasaun iha suku Macadique ho totál aldeia 21 no totál abitante rihun 8.149 no totál uma-kain 1.160.
Jornalista: Vitorino Lopes da Costa
Editór : Florencio Miranda Ximenes
