PN hato’o votu pezár ba falesimentu antigu Deputadu Virgílio Marçal

DILI, 07 maiu 2024 (TATOLI)-Parlamentu Nasionál (PN), tersa ne’e, liuhusi reuniaun plenária aprova votu  pezár ba falesimentu antigu Deputadu Virgílio Maria Dias Marçal ho idade 69, ne’ebé hakotu iis iha loron 2 fulan Maiu tinan ne’e, iha Ospitál Nasionál Guido Valedares (HNGV, siglá portugés) tanba sofre moras stroke.   

“Ita iha kórum Deputadu na’in 44, ho rezultadu votasaun afavór-44, kontra no abstensaun 0, ne’ebé votu ba falesimentu ba antigu Deputadu, Virgílio Maria Dias Marçal  pasa,’’ Prezidente Parlamentu Nasionál (PPN), Maria Fernanda Lay, hato’o iha sala plenária Parlamentu.

PN hato’o sentidu lutu

Biban ne’e, Xefe Bankada CNRT, Duarte Nunes, hato’o sentimentu triste tanba bankada no partidu CNRT  sente lakon ema di’ak ida ne’ebé desde preparasaun  partidu to’o harii, kuaze tinan 15 hamutuk ho partidu to’o husik fila ba mundu seluk. “nune’e sente lakon boot, ba serbisu ne’ebé kontribui ba partidu ita la haluha no fiar nia iha mundu seluk  nia espíritu nafatin  propoin ba partidu ne’e  lao nafatin ba oin hodi boot ba beibeik”.

Nia mós hanesan membru Parlamentu periódu rua durante ne’e prezensa iha PN sempre halo esforsu atu halo serbisu ho ema hotu.

“Lori bankada no partidu nia naran ami hato’o pronfunda sentidu kondolénsia ba família enlutada, liliu ba nia kaben no nia oan sente todan lakon ida ne’e, ami espera maromak haraik nafatin rahun di’ak ba família simu situasaun todan ida ne’e,’’nia hato’o.

Entretantu, Xefe bankada PD, Manuel Roronha, lori bankada iha uma-fukun PN  hato’o sentidu kondolénsia ba família ne’ebé lakon aman di’ak ida iha família ohin loron la hamutuk ho ita boot sira, maromomak fó fatin di’ak ba nia.

Nune’e mós, Xefe Bankada FRETILIN, Aniceto Longuinhos Guterres, dehan saudozu hanesan  eis deputadu PN ba lejislatura rua no antes matebian sai deputadu  nia-parte koñese ituan de’it matebian desde Indonézia nia tempu.

“Ha’u lori ha’u nia naran rasik no bankada FRETILIN ohin duni expresa sentidu kondolénsia no solidariedade tomak ba oan ki’ak sira no família enlutada, no expresa partidu CNRT ne’ebé lakon polítiku di’ak ida, iha momentu defísil ida ne’e, ita hotu reza ba Maromak atu Maromak simu saudozu iha kadunan santu,’’  Deputadu ne’e hato’o.

Xefe Bankada KHUNTO, António Verdial de Sousa, expresa profunda kondolénsia deskansa ho hakamtek iha reinu lalehan.

Ikus liu, Xefe Bankada PLP, Maria Angelina Sarmento,  hateten matebiaun nu’udar deputadu iha primeriu lejislatura no re-eleitu iha terseiru lejislatura ne’ebé asume mós prezidente iha komisaun rua ne’ebé husik memória iha órgaun soberania ne’e hodi kontribui ba dezenvolvimentu nune’e hakarak hato’o agradesimentu.

Entetantu, hafoin PN aprova votu pezár ramata kontinua ho sesaun solene komprimenta família no  iha de’it saudozu nia fotográfia.

Tuir obsevasaun ne’ebé Ajénsia TATOLI observa iha sala plenária laran  hamonu matawen husi Prezidente PN no deputadu sira iha lejislatura daneen ba falesimentu antigun deputadu ne’e.

Iha loron 4 maiu  família haloot ona  matebian  Virgílio Maria Dias Marçal nia isin  iha rai moris fatin Gari-Uai, Baucau.

Biográfia badak

Antigu deputadu ne’e moris iha loron  23 dezembru 1954, iha suku Gari-Uai, Postu Administrativu Baucau, Munisípiu Baucau, oan husi João Gusmão Marçal no Josefina Alice Dias Ximenes, iha maun alin na’in-hitu no matebian nu’udar oan daruak.

Matebian kaben ho Paulina Dulce Guterres ne’ebé iha oan na’in-lima.

Matebian frekuenta eskola primária to’o  segunda klase iha Laleia, husi tinan 1964-1965, hafoin kontinua to’o kuarta klase iha koléjiu Dom Bosco Fatumaca iha 1966-1968, tuir mai frekuenta eskola téknika  komérsiu no indústria Silva Cunha iha Dili,  entre 1982-1985 halo estudu iha akadémia Pemerintahan Dalam Negeri iha Ujung Panjang (APDN).

Iha 1982-1988, hala’o estudu iha fakuldade siensia sosiál no polítika iha universidade Gajah Madah iha Yogyakarta-Indonézia.

Durante tempu okupasaun Indonézia serbisu iha sekretariadu konsellu reprezentativu popular rejionál iha Baucau, iha 1988-1994 asume xefia ba serbisu meiu ambiente provínsia  iha Dili, no 1994-1999 asume pasta administradór distritu Baucau, iha 2003-2007 asesór iha Prezidente Repúblika.

Eleitu hanesan deputadu segundu lejizlatura periódu 2007-2012, hodi asume mós kargu prezidente komisaun ne’ebé trata asuntu saúde, edukasaun no kultura, no hetan re-eleitu iha terseiru lejislatura iha 2012-2017 ne’ebé asume mós pasta prezidente komisaun ne’ebé trata asuntu finansa públika.

Sai mós dosente iha universidade UNTIM no institutu teknóljia Dili. Asume pasta prezidente federasaun nasionál antigu alunu salesianu Timor no Indonézia entre 1990-2002.

Hanesan membru konsellu diretivu nasionál partidu CNRT desde 2011 to’o agora ho nia loron falesimentu, dezempeña kargu vise-prezidente partidu CNRT iha 2006-2011 no nu’udar koordenadór sekretáriadu komisaun sosiedade sívil ba dezenvolvimentu iha komisaun planu.

Nune’e, PN liuhusi sesaun plenária expresa profundu pezár ba falesimentu antigu deputadu ne’e no mós hato’o sentidu kondolénsia ba nia kaben ho nia oan, no partidu CNRT ho família, parente enlutada.

Povu pezár ne’e aprezenta husi deputadu proponente Duarte Nunes, Romeu Moizes (CNRT) ho Manuel Henrique Noronha (PD).

Jornalista: Nelson de Sousa

Editór     : Florencio Miranda Ximenes