iklan

COVALIMA, HEADLINE

Presiza pinta foun zebra cross iha estrada sira iha Covalima

Presiza pinta foun zebra cross iha estrada sira iha Covalima

Tinta zebra cross iha área Tabakolot, suku Debos, komesa lakon ona. Foto/Celestina Teles.

COVALIMA, 07 Maiu 2024 (TATOLI) – Pasadeira ka zebra cross hamutuk 10-resin iha estrada sira iha Covalima presiza atu pinta foun tanba tinta sira komesa lakon ona, hateten Diretór Transporte no Komunikasaun Covalima, Joaquim Gusmão.

“Tinta zebra cross iha Covalima kuaze la moos hotu ona no ita hatene katak zebra cross nia funsaun mak fasilita ema la’o ain sira atu bá-mai ho seguru”, Joaquim Gusmão dehan iha Bairru Costa, ohin.

Orsamentu ba sosa tinta zebra cross ne’e tau ona iha planu asaun anuál (PAA) kada tinan no nia prosesu ne’e husi nasionál mak loke konkursu públiku ba empreza sira atu pinta pasadeira no liña mutin iha estradra. Enkuantu, diretór ne’e dehan to’o ohin loron seidauk iha rezultadu, nune’e iha munisípiu kontinua hein desizaun husi nasionál.

“Iha tinan rua liubá empreza ne’ebé ha’u la hatene nia naran pinta foun estrada ho zebra cross iha Covalima la liu husi Diresaun Transporte no Komunikasaun. Iha momentu ne’ebá sira pinta sala ha’u hasee, maibé  kompaña hatán katak pinta tuir orientasaun hosi nasionál nune’e husi munisípiu labele halo buat ida”, nia dehan.

Diresaun Transporte observa ona estrada sira ne’ebé presiza atu pinta mak iha Banku Nasionál Ultramarinu nia oin, merkadu Debos no iha eskola oin sira atu tulun estudante sira ultrapasa ho seguru.

Sidadaun Fernando Amaral reforsa katak zebra cross iha Covalima kuaze tinta lakon hotu  ona no fó impaktu ba ema la’o ain sira, tanba ne’e presiza tau importánsia hodi pinta foun.

“Ita hatene zebra cross importante hodi fó oportunidade ba ema la’o ain sira ultrapasa ba-mai. Se laiha zebra cross fó impaktu ba ema, nune’e bele hamosu asidénte tráfegu”, realsa.

Jornalista: Celestina Teles

Editora: Maria Auxiliadora

iklan
iklan

Leave a Reply

iklan
error: Content is protected !!