DILI, 07 maiu 2024 (TATOLI) – Prezidente Repúblika José Ramos Horta, partisipa iha serimónia Resepsaun Eskritóriu Nakloke (Open Office Reception) ne’ebé organiza husi Embaixada Brunei Darussalam iha Timor Plaza hodi subliña relasaun forte entre Timor-Leste ho Brunei Darusalam.
Iha biban ne’e, Xefe Estadu hateten importánsia hodi respeita no partisipa iha eventu kulturál sira ne’ebé organiza husi embaixada estranjeiru no bainaka sira iha Timor-Leste.
“Se ita-nia bainaka hanesan embaixada sira hala’o serimónia ruma, ita presiza hatudu respeitu no hakarak atu partisipa, tan ne’e mak ha’u mai iha ne’e,” Xefe Estadu hatete ba Jornalista sira iha Timor Plaza.
Tuir Prezidente Repúblika, eventu ne’e hanesan parte ida husi selebrasaun relijioza, kulturál no tradisionál ne’ebé nasaun Muslima sira hala’o hafoin Ramadan.
Xefe Estadu konfirma katak Timor-Leste iha relasaun no kooperasaun ne’ebé di’ak tebes ho Brunei Darussalam, nune’e nia fó hahí ba Sua Majestade Sultan Hassanal Bolkiah nia lideransa, ne’ebé hamosu pás, estabilidade, no laiha krime direitu umanu no radikalizmu iha Brunei.
“Ha’u konese di’ak Sua Majestade, liuliu husi enkontru no konferénsia internasionál sira ne’ebé nia sempre partisipa,”Horta katak hodi relembra ba tinan 10-resin ba kotuk nia tempu nu’udar Ministru Negósiu Estranjeiru.
Nia hato’o ninia agradesimentu ba apoia husi Brunei ba adezaun Timor-Leste nian ba ASEAN, komesa husi tempu ne’ebá to’o estabelesimentu Embaixada Brunei nian iha Dili iha tinan 2015 no kontinua to’o agora.
Prezidente Repúblika hato’o konvite ba Sua Majestadu Sultan atu vizita Timor-Leste iha loron 20 fulan-maiu nu’udar konvidadu espesiál ida iha seremónia aniversáriu Restaurasaun Indepéndénsia Timor-Leste nian ba da-22.
“Ita presiza prepara didi’ak atu simu Sua Majestade,” nia konklui.
Jornalista: Hortencio Sanchez
Editór: Florencio Miranda Ximenes
