iklan

HEADLINE, SAÚDE

Funsionáriu MOP halo doasaun raan hodi komemora Loron Restaurasaun Independénsia

Funsionáriu MOP halo doasaun raan hodi komemora Loron Restaurasaun Independénsia

Ilustrasaun doasaun raan. Imajen hosi google

DILI, 08 Maiu 2024 (TATOLI) – Ministériu Obra Públika (MOP) no Ospitál Nasionál Guido Valadares (HNGV, sigla portugés) organiza atividade doasaun raan hodi komemora Loron Restaurasaun Independénsia Timor-Leste iha 20 Maiu.

Vise-Ministru Infraestrutura, Júlio do Carmo, hateten raan turuk ida importante ba ema nia vida, nune’e ministériu hala’o nia atividade kada tinan hodi fó tulun ba sira seluk ne’ebé presiza. “Ita hotu tenke ajuda ema seluk. Agradese ba funsionáriu sira hotu ne’ebé hakarak fó raan liuhusi sira-nia laran di’ak”, Júlio do Carmo hateten iha Caicoli.

Governante ne’e dehan MOP sei hala’o mós atividade sira seluk hanesan bazár baratu iha ponte BJ Habibie no resintu MOP iha 17 Maiu.

Iha sorin seluk, Xefe Departamentu Banco de Sangue iha HNGV, Claúdio Júlio Quintão, konsidera atividade doasaun raan bele ajuda ospitál sira hodi halo transfuzaun raan ba ema seluk.

“Oportunidade ne’e furak tebetebes atu fó importánsia ajuda ema seluk, liuliu pasiente hirak ne’ebé internadu iha Ospitál Nasionál Guido Valadares. Ita la atende de’it iha ospitál nasionál, maibé mós fó atendimentu ba iha ospitál referénsia sira no klínika privada sira ne’ebé agora ne’e ativa hela”, Claúdio Júlio Quintão salienta.

Nia hateten ekipa Banco de Sangue fó sira-nia apoiu tékniku no agaradese tebes, tanba atividade ida ne’e hala’o ona ba dalarua husi Ministériu Obra Públika. “Ha’u hanoin sai ezemplu ba ministériu sira seluk, tanba ministériu ida ne’e mak agora ativu no ema partisipa ne’e mós barak”.

Nia admite katak iha ospitál ne’e dalabarak stock raan falta hela de’it no ida ne’e loos tanba pasiente lubuk ida ne’ebé loloos ne’e halo de’it transfuzaun raan iha munusipiu tenke transfere mai nasionál tanba kestaun ne’e.

“Dalaruma ita haree númeru transfuzaun raan aas tebetebes, liuliu hirak ne’ebé hetan anemia, kankru raan, fase raan. Dalaruma mai husi foho no familia laiha, tanba ne’e mak ita tenke fó apoia raan no ita buka raan nafatin”, xefe departamentu esplika.

Nia apresia ba ema hirak ne’ebé ho vontade rasik hakarak oferese raan hodi ajuda ema seluk. “Ne’e hanesan ita sai eroi ida, ita fahe ita-nia domin atu tulun ema hirak ne’ebé ita lakoñese. Ha’u hanoin ne’e karidade ida ne’ebé boot lahalimar”.

Iha atividade doasaun ran, funsionáriu sira hamutuk 40 mak halo rejistu no ekipa Banco de Sangue halo selesaun molok halo doasaun raan.

HNGV koopera ho instituisaun seluk hodi kolleta raan

Aleinde MOP, Ospital Nasionál Guido Valadares koopera mós ho instituisaun Estadu seluk, organizasaun naun-governamentál sira atu fornese raan ba iha Banco de Sangue tanba mosu preokupasaun husi família pasiente kona-ba falta raan iha HNGV.

Diretór Servisu Apoiu Diagnóstiku no Terapéutiku iha HNGV, Vidal de Jesus Lopes, hateten ospitál mós aprezenta ona karta ba eskola sira hanesan Universidade Nasionál Timor Lorosa’e (UNTL), Institutu Siénsia Saúde, ba Kruz Vermella Timor-Leste (CVTL), Banku Mundiál, embaixada sira hodi bele halo doasaun raan. Bainhira instituisaun sira ne’e responde ona mak ekipa Banco de Sangue tuun bá kolleta raan.

Ekipa bá rekolla hotu raan depois hotu lori bá HNGV atu halo teste hodi hatene kualidade tipu raan A, B, AB no O. “Ran ne’ebé ladi’ak ka iha moras sei lauza no ida ne’ebé di’ak mak sei uza ba pasiente sira ne’ebé halo pedidu”, nia realsa.

Banco de Sangue HNGV rekolla raan husi instituisaun Estadu no organizasaun naun-governamentál no voluntáriu sira iha Janeiru hamutuk stock 536, Fevereiru 380 no Marsu 504.

Jornalista: Jesuína Xavier

Editora: Maria Auxiliadora

iklan
iklan

Leave a Reply

iklan
error: Content is protected !!