DILI, 08 Maiu 2024 (TATOLI) – Diretór Servisu Apoiu Diagnóstiku no Terapéutiku iha Ospitál Nasionál Guido Valadares (HNGV, sigla portugés), Vidal de Jesus Lopes, rekoñese katak ospitál iha stockout ai-moruk 20%.
Vidal de Jesus dehan ho falta ai-moruk ne’e iha sidadaun balun kestiona iha rede sosiál kona-ba falta medikamentu iha HNGV mak hanesan ai-moruk Walfarin, Sinvastatin, Aspirin no Omeprazol.
“Atu hateten klaramente ba públiku katak stockout ai-moruk agora aumenta ba 20%. Uluk ne’e entre 14 no 15%. Husi 20% ne’e item 82 mak laiha husi totál 405. Maske iha situasaun stockout ai-moruk iha HNGV hanesan Walfarin no Omeprazol, maibé soru-been tama ona horisehik”, responsavel ne’e informa iha HNGV.
Nia esplika katak ai-moruk sira ne’e stockout iha HNGV, tanba pasiente barak, maibé ba Sinvastatin no Aspirin iha ona prosesu kompra nia laran, tanba ne’e seidauk tama iha HNGV.
Vidal de Jesus Lopes salienta katak HNGV kontinua halo koordenasaun ho Diresaun Nasionál Farmásia no Medikamentu no ho Institutu Nasionál Farmásia no Produtu Medikamentu hodi halo akizisaun ba medikamentu sira ne’e.
Aleinde ne’e, HNGV mós bele foti desizaun ida halo kompra ba ai-moruk ho karáter urjénsia liuhusi empreza sira ne’ebé hetan kontratu hodi bele sosa fali iha klínika sira. “Sira mak tenke buka farmásia privada sira iha rai-laran hodi fornese ba ami. Ami labele halo kompra direta ba farmásia”, dehan.
Diretór ne’e realsa tan katak demanda HNGV boot tebes ba fahe ai-moruk ba pasiente sira, tanba iha kama 400 ne’e nakonu loroloron. “Entaun ai-moruk sira mai ne’e distribui no hotu lalais. Ita seidauk sura ho pasiente sira ne’ebé mai halo kontrolu. Ospitál ida ne’e simu pasiente entre 800 no 1.000”, nia relata.
Stockout medikamenteu iha HNGV mak hanesan ai-moruk vitál kompostu husi Cefuroxime Powder for syrup 125mg/5ml, Cefuroxime Powder forsyrup 125mg/5ml, Cloxacillin Powder for oral solution 125mg/5ml no Ergometrine hydrogen maleate Injection 200mcg/ml.
Medikamentu esensiál mak Acetylsalicylic acid Tablet 100 mg, Acetylsalicylic acid Tablet 300mg, Aciclovir (Acyclovir) Powder for injection 250mg no Aciclovir (Acyclovir) Tablet 200mg.
Ai-moruk nesesáriu mak Aluminium hydroxide Tablet 500mg, Clindamycin phosphate Injection 150mg/ml no Ergotamine tartrate + caffeine tablet 20mg no seluktan.
Iha mos item espesialista nian mak hanesan Ampicilin + Sulbactam powder for injection 1gram+0.5gram, Anti tetanus Serum (ATS) 1500IU, Acetylalicylic acid Tablet 75 mg no Atenolol 50 mg no seluktan.
Iha mós lista konsumivel ne’ebé stockout mak hanesan Alcohol Swab 70% Isopropyl Alcohol 65 x 56 mm, Antibacterial/Viral Filter pediatria, Autoclave sterelization Bag for Instrument Self-Sealing 230 x 365 mm no Autoclave sterelization Bag for Instrument Self-Sealing 25 x 38mm no seluktan.
Jornalista: Jesuína Xavier
Editora: Maria Auxiliadora
