iklan

COVALIMA, HEADLINE

MAKLN presiza halo auditoria ba utilizasaun orsamentu apoiu sosiál ba veteranu mate

MAKLN presiza halo auditoria ba utilizasaun orsamentu apoiu sosiál ba veteranu mate

Membru Konsellu Veteranu munisípiu Covalima, Domingos Oliveira ‘Foti Riba’, no espoza matebian Frederico Barros, Isabel da Conceição. Foto/Celestina Teles.

COVALIMA, 08 Maiu  2024 (TATOLI) – Membru Konsellu Veteranu munisípiu Covalima, Domingos Oliveira ‘Foti Riba’, husu ba Ministériu Asuntu ba Kombatente Libertasaun Nasionál (MAKLN) atu halo auditoria ba utilizasaun orsamentu liga ba apoiu sosiál ba veteranu sira, liuliu bainhira mate.

Foti Riba esplika katak, kuandu kombatente ida mate, ministériu apoia kaixaun ho bandeira RDTL no osan $300 no seluk tan. “Maibé, iha realidade membru balun entrega de’it osan $40 no lilin kaixa ida bainhira veteranu mate”, nia lamenta.

Ho atu ida ne’e mak nia solisita atu halo auditoria hodi hatene utilizasaun orsamentu ho loloos, tanba situasaun ida ne’e hafo’er Ministériu Asuntu Kombatente Libertasaun Nasionál no veteranu nia naran.

Nia relata asaun ida ne’e tanba akontese ba matebian veteranu Frederico Madeira Alves Barros  foin lalais ida Covalima. “Bazeia ba pedidu ne’ebé asina husi veteranu na’in-rua no prezidente konsellu veteranu aprova atu apoia orsamentu $310, maibé realidade entrega osan $40 ba espoza Frederico Barros”.

“Ha’u la satisfeitu ho atu membru konsellu balun entrega la tuir pedidu ne’ebé aprova hosi prezidente konselu veteranu hamutuk $ 310, maibé iha termu entrega osan ba saudozu nia espoza ho valór $156 no osan restu ba iha ne’ebé ita la hatene. Bazeia ba konfirmasaun husi reprezentante veteranu iha nasionál, Francisco Lamesak, membru na’in rua hateten entrega osan 190, maibé realidade entrega $40 no lilin kaixa ida”, nia kestiona.

Espoza matebian Frederico Barros, Isabel da Conseição, rekoñese katak membru konsellu nain-rua entrega osan $40 no lilin kaixa ida hafoin haruka nia asina termu entrega ne’ebé la tau montante osan.

“Iha momentu ha’u-nia katuas oan mate konsellu veteranu munisípiu Covalima ajuda de’it osan $40 ho lilin kaixa ida, hafoin ha’u asina, ha’u la satisfás, tuir loloos $300”, nia lamenta.

Frederico Madeira Alves Barros hakotu nia pregrinasaun iha mundu iha loron 10 Abríl tanba sofre moras ne’ebé lahatene nia kauza. Saudozu de repente monu iha natar no la konsege lori bá ospitál. Nia husik hela oan na’in-lima, feto rua no mane tolu.

Jornalista: Celestina Teles

Editora: Maria Auxiliadora

iklan
iklan

Leave a Reply

iklan
error: Content is protected !!