DILI, 08 maiu 2024 (TATOLI)- Ministru Petróleu no Rekursu Minerál (MPRM), Francisco da Costa Monteiro, halo klarifikasaun ligadu ho empreza internasionál ENERPROG Group, hato’o pedidu arbitrajen hasoru Timor Gap iha Tribunál Internasionál Arbitrajen ICC Singapura ba rezolusaun disputa kontratu kontra empreza estatál TIMOR GAP.
“Ne’e la’ós empreza más ne’e Konsultór tékniku ida ne’ebé mak uluk halo servisu ba Timor Gap entaun interpretasaun kona-ba servisu sira ne’ebé halo ona ba Timor Gap no Timor Gap sente katak iha nesesidade hapara ona kontratu ho sira, entaun sira lasatisfeitu, no sira hakarak lori prosesu ne’e ba Tribunál Albitrajen, ne’e buat ida normál tebetebes iha jestaun kontratu, ne’ebé lalika preokupa ba asuntu ida ne’e. Laiha impaktu negativu ba Governu no Timor-Leste”, Ministru Petróleu hato’o asuntu klarifikasaun ne’e, hafoin relata progresu servisu ba Primeiru-Ministru (PM), Kay Rala Xanana Gusmão, iha Palasiu Governu
Empreza referidu husi nasaun Estadu Unidus Amérika (EUA) ne’ebé serbisu ka foku iha área konsultór tékniku ba Produsaun Petróleu no Gas.
Alende ne’e, Governante ne’e mós atualiza servisu sira kona-ba negosiasaun ba dada Greater Sunrice ho Governu Austrália no kompañia konsórsiu sira.
“Mai atualiza ba Primeiru-Ministru kona-bá servisu balun ne’ebé Ministériu Petróleu halo, liu-liu kona-ba planu enkontru trilaterál ne’ebé sei realiza iha Austrália, ekipa lideradu hosi Prezidente Autoridade Nasionál Petróleu (ANP), Gualdino do Carmo da Silva. Ekipa hosi Timor-Gap no espesialista sira sei hasoru malu ho sira-nia parseiru iha mós Austrália”, Ministru Francisco da Costa Monteira hateten ba jornalista-sira.
Tanba ne’e, Ministru Francisco dehan, ekipa persiza halo enkontru estratéjiku balun, hodi bele halo preparasaun ba enkontru ne’e. Ne’ebé mai hasoru Primeiru-Ministru para rona hanoin ba asuntu sira ne’e.
Governante ne’e hatutan, atualiza mós servisu balun halo iha Kosta-Súl ne’ebé nia rasik aban ka bainrua ba Suai (Covalima) no Betanu (Manufahi) para haree projetu tasi-mane nian, no servisu sira seluk ne’ebé dadaun halo.
“Primeiru-Ministru nafatin apoia planu no programa ne’ebé ministériu iha no enkoraza atu ministériu ho ekipa tomak bele implementa planu sira ne’ebé aprova tiha ona iha Parlamentu Nasionál”, Ministru Francisco dehan.
Iha kontestu negosiasaun ho Austrália, Primeiru-Ministru kontente tebetebes katak ekipa rua hosi Austrália no Timor-Leste ho kompañia konsórsiu venture sira kontinua servisu ho espíritu kolaborasaun, espíritu buka solusaun ba asuntu sira ne’ebé maka nesesariamente iha idaidak nia interrese maibé hothotu tenke buka solusaun konjunta ida, entaun PM enkoraza para ekipa no ministériu bele servisu ho espíritu kolabora malu para buka solusaun hamutuk.
Notisia relevante: PM Xanana husu Woodside respeita interese parseiru ba dezenvolvimentu Greater Sunrise
Jornalista: Hortencio Sanchez
Editór: Florencio Miranda Ximenes
