COVALIMA, 09 Maiu 2024 (TATOLI) – Inspesaun-Jerál Traballu (IJT) identifika empreza internasionál rua iha Covalima viola Lei Traballu, informa Inspetór-Jerál Traballu Rejionál munisípiu Covalima, Gabriel Gusmão.
“Kompañia internasionál rua viola Lei Traballu tanba la halo estensaun ba karta autorizasaun traballu, maibé kontinua hala’o atividade negósiu no hala’o serbisu”, Inspetór-Jerál Traballu Rejionál, munisípiu Covalima, Gabriel Gusmão, informa iha Bairru Costa, ohin.
Tanba ne’e, IJT aplika kedas medida prosesu administrativu hodi selu multa hamutuk $690, tanba kada empreza selu $345 ba konta bankária IJT, iha Banku Nasionál Ultramarinu (BNU) Covalima .
Gabriel Gusmão salienta katak IJT foin identifika de’it empreza rua ne’e, tanba hasoru dezafiu hanesan falta rekursu umanu no laiha transporte atu halo vizita traballu bá empreza sira seluk ne’ebé eziste iha Covalima. Maske hato’o ona preokupasaun sira ne’e, maibé to’o agora seidauk iha rezultadu.
Ho dezafiu sira ne’ebé IJT hasoru maka inspetór nia funsionáriu sira ho inisiativa uza motorizada privada hodi halo inspesaun ba empreza sira iha postu Suai mak identifika empreza rua ne’ebé la fó sai naran mak viola lei.
Daudaun ne’e, funsionáriu ne’ebé serbisu iha Inpesaun-Jerál Traballu Covalima hamutuk na’in-tolu, husi númeru ne’e inklui ho Inspetór Rejionál Covalima.
Iha 2023, IJT rejista empreza 51 – lokal 22 no internasionál 29, ne’ebé liuhusi vizita traballu IJT indentifika empreza 17 mak viola Lei Traballu númeru 4/2012, tanba traballadór la uza ekipamentu protesaun no viola kontratu traballu. IJT fó kedan notifikasaun hodi selu multa ba Estadu tuir lei. Inspesaun-Jerál Traballu Covalima kontribui reseita $13.915 ba kofre Estadu iha tinan kotuk.
Traballodór Valetina da Costa mós ejize ba empreza Futuru Mane Mesak Unipesoál Lda atu selu sira na’in-27 nia saláriu husi fulan-Agostu tinan 2023 to’o ohin loron, tanba tuir kontratu loron ida selu traballadór ida $7 no iha Fevereiru 2024 ne’e kompañia asina ona akordu ho traballadór atu selu saláriu, maibé seidauk realiza.
“Trabaldór na’in-27 hato’o keixa dala tolu ona ba Sekretaria Estadu Formasaun Profisionál no Empregu Covalima, maibé seidauk iha rezultadu. Ami nafatin ejize kompañia atu selu ami-nia saláriu”, nia afirma.
Jornalista: Celestina Teles
Editora: Maria Auxiliadora
