DILI, 09 maiu 2024 (TATOLI) – Diretór Komérsiu Internu iha Ministériu Komérsiu no Indústria Gabriel da Costa, hateten Empreza Walgen Walter 10 Unipesoal Lda no Reynazhunior Unipesoal Lda, halo reabilitasaun, iha semana oin, ba merkadu Taibesi no Manleuana.
“Semana oin ita-nia Empreza Walgen Walter 10 Unipesoal Lda no Empreza Reynazhunior Unipesoal Lda, hahú halo reabilitasaun ba merkadu Taibesi no Manleuana”, Gabriel da Costa informa ba jornalista sira iha MCI Bebora, ohin.
Nia dehan, atu halo reabilitasaun nia vantajen mak atu loke espasu ba vendendór sira, hadia haris fatin sira ne’ebé mak aat ona no hadia liña eletrisidade sira ne’ebé mak la funsiona.
“Ita haree ba haris fatin sira ne’ebé mak aat no loke luan tan epasu ba vendedór sira inklui ahi sira ne’ebé la funsiona, ida-ne’e mak ita sei halo”. nia relata.
Nia afirma, reabilitasaun ne’e ho duransaun fulan neen, bazeia ba kontratu ne’ebé empreza asina ho Governu.
“Reabilitasaun ne’e durante fulan neen no orsamentu ba merkadu rua ne’e hamutuk rihun atus rua”, nia subliña.
Iha fatin hanesan, Empreza Walgen Walter 10 Unipesoal Lda no Walter Martins, sei halo peskiza ba merkadu Taibesi, atu semana oin hahú ona rebailitasaun ba merkadu refere.
“Enkontru remata, lokraik ami ho ekipa sira ba haree ona merkadu, nune’e lori materiál sira ba, atu semana oin hahú halo ona reabilitasaun”, Walter Martins esplika.
“Ami kompromete ho Governu katak fulan neen tenke remata tanba ne’e ami esforsu atu halo servisu sira ne’e”, nia dehan.
Iha enkontru ne’e, ekipa sira mai hosi liña ministeriál sira hanesan Sekretáriu Estadu ba asuntu Toponomia no Organizasaun Urbana (SEATOU), Ministériu Administrasaun Estatal (MAE) Autoridade Munisípiu Dili.
Jornalista : Felicidade Ximenes
Editór : Zezito Silva
