iklan

EDUKASAUN

F-FDTL kontinua apoiu ME iha área edukasaun

F-FDTL kontinua apoiu ME iha área edukasaun

Xefe Estadu Maiór Jenerál, Falur Rate Laek, kinta ne’e, halo vizita kortezia ba Ministériu Edukasaun, iha salaun Konferénsia ME, Vila Verde, kinta (09/05/2024). Imajen Tatoli/Osória Marques

DILI, 09 maiu 2024 (TATOLI)–Xefe Estadu Maiór Jenerál, Falur Rate Laek, kinta ne’e, halo vizita kortezia ba Ministériu Edukasaun (ME) hodi reforsa no hametin koordenasaun iha área edukasaun iha Timor-Leste.

“Ohin ami mai vizita informál de’it, mai haree liu de’it, laiha asuntu seluk maibé ha’u mai hakarak rona Ministra nia hanoin kona-ba edukasaun sira-ne’e oinsá, ha’u laiha morál forte ba iha Ministériu Edukasaun mais ha’u-nia prezensa iha-ne’e hanesan autoridade morál no legál, ne’ebé ha’u iha-ne’e importante, ne’e hanesan enkorajamentu ida orden rekoñesimentu. Nune’e, ba oin mak Ministériu Edukasaun iha kordenasaun ho Ministériu Defeza ho diretiva tomak, ami kumpre de’it hodi kontinua,” Xefe Estadu Maiór Jenerál, informa hafoin vizita kortezia iha salaun Konferénsia ME, Vila Verde.

Falur Rate Laek nota katak edukasaun iha Timor-Leste ikus mai  ema ho edukasaun informál mak barak liu.

“Ami halo avaliasaun ba edukasaun iha Timor-Leste, nota katak edukasaun informál mak barak liu, ha’u ko’alia ida-ne’e tanba ligadu ho defeza seguransa. Informál barak liu mak edukasaun kuaze fraku, entaun Ministra Edukasaun halo mudansa estrutura ne’e hodi hadi’a no tais buat sira-ne’e hotu, bainhira mosu problema oin-oin ne’ebé enfrenta maibé ita-boot sira ho fuan boot, korrajen ho desizaun, ne’e mak lideransa ne’e tenke brani partisipa hodi deside desizaun ne’ebé mak ho maturidade, vizaun, misaun, entaun ha’u hanoin di’ak liu hadi’a do que aban bainrua mak dependénsia ba ema hotu,” nia sujere.

Notísia relevante : Família balun la fó oan ho kondisaun defisiénsia asesu ba edukasaun

Iha fatin hanesan, Ministra Edukasaun, Dulce de Jesus, sente onradu hetan vizita no konsidera nu’udar oportunidade di’ak hodi fahe esperiénsia, nune’e bele hasa’e kualidade edukasaun.

“Ministériu Edukasaun iha responsabilidade tomak hodi garante povu Timor ne’ebé eskola iha rai ida-ne’e hetan kualidade edukasaun, nune’e bele kontribui ba dezenvolvimentu iha Timor-Leste. Agora husi parte defeza nia oinsá bele ajuda Ministériu Edukasaun, liu-liu infrenta situasaun eskola ne’ebé estraga barak. Ita sei kontinua serbisu pasadu ne’ebé halo ona ho enjeñaria hosi F-FDTL, iha futuru sei kontinua nafatin serbisu ida-ne’e, ho apoiu husi inan-aman sira,” governante ne tenik.

Ministra dehan, kona-ba kestaun edukasaun informál mak barak liu, ME tenke halo esforsu boot ida atu reforsa di’ak liután edukasaun infromál nune’e iha graduadu kualifikadu hodi serbisu iha instituisaun Estadu no setór privadu sira.

Jornalista     : Osória Marques

Editora         : Julia Chatarina

iklan
iklan

Leave a Reply

iklan
error: Content is protected !!