DILI, 09 Maiu 2024 (TATOLI) – Reabilitasaun edifísiu Sentru Kovensaun Dili (CCD, sigla portugés) ne’ebé eskolla sai fatin enkontru entre Papa Francisco no reprezentante joven sira husi parókia hotu iha Dioseze Dili, Baucau no Maliana, atinje ona 75%.
Jerente Projetu empreza Jova Construction Unip. Lda, Jaime Gusmão, dehan Ajénsia Dezenvolvimentu Nasionál (ADN) fó projetu ba sira hodi halo reabilitasaun depoizde delegasaun husi Vatikanu mai hasoru malu ho igreja no Governu iha fulan-Janeiru.
Nia esplika katak empreza hala’o reabilitasaun tuir pedidu ADN hodi pinta muru, halo dalan Papa liu ho besi beton ho medida 227x4m2, nahe pavimentu, pinta didin lolon, kuda ai-funan talas, du’ut Japaun, halo rampa ba entrada sira ba uma kampaun no sei monta lampu iluminasaun hamutuk 100 ida haleu muru.
“Ami-nia serbisu liu fulan rua ona. Ami-nia obra reabilitasaun atinje ona 75%. Ami sei pinta hotu uma-laran sira ne’e no hadi’a odamatan ruma aat”, Jaime Gusmão hato’o ba Tatoli, iha CCD, ohin.
Jerente ne’e relata katak muru no korredór sira ne’e empreza pinta hotu ona no agora kontinua hela nahe pavimentu no hadi’a valeta, nomós prepara vazu sira atu kuda ai-funan. “Iha ekipa pembibitan ba ai-funan hanesan talas nani iha korredór ninin sira ne’e no klaran ne’e ami sei kuda du’ut”, adianta.
Reabilitasaun ba edfifísiu CCD hahú iha Fevereiru no sei termina iha Juñu. Jaime Gusmão garante katak sei finaliza reabilitasaun tuir kontratu. “Fin Maiu ami remata ona reabilitasaun. Delegasaun Vatikanu sei mai entre loron 01 to’o 05 Juñu hodi avalia ba ami-nia serbisu atu rekomenda buat ruma atu hadi’a. Ami iha fulan tolu tan atu hadi’a”, dehan.
Jaime Gusmão informa katak iha mós empreza fornesedora kadeira, jeradór no lampu iluminasaun ne’ebé hameno hela husi Surabaia-Indonézia hodi monta iha CCD. Materiál sira ne’e sei to’o iha semana rua mai.
Lembra katak Konferénsia Episkopál Timorense (CET, sigla protugés), anunsia ona vizita pastorál Papa Francisco mai Timor-Leste entre 09 no 11 setembru.
Aleinde vizita CCD hodi halo enkontru ho joven, Papa Francisco sei bá fatin sira hanesan Aeroportu Internasionál Prezidente Nicolau Lobato Dili, Palásiu Prezidente Nicolau Lobato, Katedrál Dili, konventu Asosiasi Lembaga Misionaris Alam (ALMA) iha Dili, Motaél no selebra misa iha Tasi-Tolu.
Notísia relevante: Preparasaun simu Papa Francisco: Empreza Eureka Gagas Utama reabilita igreja Motael
Jornalista: Jesuína Xavier
Editora: Maria Auxiliadora
