iklan

HEADLINE, INKLUZAUN SOSIÁL

Benefisiáriu 4.000-resin pensaun sosiál faze dahuluk seidauk simu pagamentu

Benefisiáriu 4.000-resin pensaun sosiál faze dahuluk seidauk simu pagamentu

Prezidente INSS, Arlindo Pinto. Imajen Tatoli/Francisco Sony

DILI, 10 maiu 2024 (TATOLI)—Benefisiáriu 4.000-resin husi totál 97.644 pensaun sosiál faze dahuluk seidauk simu pagamentu.

Totál benefisiáriu pensaun sosiál kompostu husi ema ho defisiénsia 8.725 (9%) no ferik-katuas hamutuk 88.919 (91%).

“Pagamentu hahú iha loron 18 marsu no ramata ona iha 25 abríl. Benefisiáriu ne’ebé hetan ona direitu pensaun 86.000 no benefisiáriu 11.000 mak sei iha sistema verifikasaun, enkuantu benefisiáriu 4.000-resin seidauk halo pagamentu ho razaun konta bankária la hanesan, mudansa eleitorál no Billete Indentidade (BI),” Prezidente Institutu Nasionál Segurnasa Sosiál (INSS), Arlindo Pinto, informa, hafoin prienxe programa entrevista eskluziva Agência Tatoli, iha estúdiu Farol, sesta ne’e.

Notísia relevante : Governu halo ona pagamentu pensaun sosiál ba idozu-invalidéz 90.552

Orsamentu ba pagamentu pensaun sosiál faze dahuluk tinan ne’e, ho montante $22.141,670, ne’ebé husi orsamentu ne’e ezekuta ona millaun $20, enkuantu millaun $2 seidauk.

“Ba sira ne’ebé seidauk hetan pagamentu iha faze dahuluk ita sei prosesa no sei simu iha faze daruak, ne’ebé ekipa agora halo preparasaun ba faze daruak ne’ebé sei realiza iha juñu 2024,” nia akresenta.

Pagamentu pensaun sosiál ba fahe dahuluk ida-ne’e, benefisiáriu ho tinan 60 to’o 69 sei simu $60 kada fulan ho totál benefisiáriu 28.896, benefisiáriu ho tinan 70 to’o 79 sei simu $80 kada fulan ho totál benefisiáriu 44.045, benefisiáriu ho tinan 80 ba leten sei simu $100 kada fulan ho totál 15.978.

Benefisiáriu ba pensaun sosiál ferik-katuas no ema ho defisiénsia ne’ebé sei simu pagamentu liuhusi Banku Nasionál Komésiu Timor-Leste (BNCTL, sigla portugés) hamutuk 97.139, Banco Nacional Ultramarino (BNU) 222, Bank Republik Indonesia (BRI) 226 no Banku Mandiri 57.

Benefisiáriu ne’ebé iha ona konta bankária liuhosi Automated Teller Machine (ATM) P24 hamutuk 15.249 no benefisiáriu ne’ebé simu pagamentu ho konta bankária direta hamutuk 82.395.

Aleinde ne’e, rejistrasaun foun ba benefisiáriu pensaun sosiál iha tinan 2024, hahú husi janeiru to’o marsu iha ema 1.406, husi númeru ne’e benefisiáriu ne’ebé rejistu iha banku hodi loke ona konta bankária hamutuk 119, no benefisiáriu ne’ebé seidauk loke konta bankária 1.287.

MSSI mós rejista benefisiáriu pensaun sosiál sira ne’ebé iha deklarasaun óbitu husi autoridade kompetente hamutuk 651, kompostu husi ema ho defisiénsia 19 no ferik-katuas 632.

Jornalista     : Arminda Fonseca

Editora          : Julia Chatarina

iklan
iklan

Leave a Reply

iklan
error: Content is protected !!