Deklarasaun Primeiru-Ministru Kona-bá Falesimentu Helen Hill
DILI, 09 maiu 2024 (TATOLI)- Primeiru Ministru (PM), Kay Rala Xanana Gusmão, fó-sai deklarasaun ida kona-bá falesimentu hosi Helen Hill, katak nia hala’o ninia vida solidária ho Timor-Leste (TL).
Iha deklarasaun ne’e Xefe Governu hateten, Helen Hill mai vizita Timor-Leste bá dala uluk iha inísiu tinan 1975, bainhira nia rekorda “espetativa no optimizmu”.
Xefe Governu sita Helen Hill ninia planu hodi hakerek teze mestradu nian kona-bá tranzisaun bá independénsia Timor Portugés to’o ona fim bainhira Indonézia hahú invazaun.
Xanana Gusmão deklara mós katak, saudoza hakerek kona-bá “Istória Timor nian” ne’ebé publika iha tinan 1975 nia rohan, no sai hanesan bíblia bá estudiozu no ativista sira ne’ebé hakarak hatene kona-bá akontesimentu sira iha Timor-Leste ho funu ne’ebé lori invazaun.
Helen nu’udár lisensiada akadémika internasionál iha área dezenvolvimentu komunitáriu iha Timor-Leste no sai hanesan orientadora bá estudante timoroan rihun bá rihun iha Díli no mós iha Victoria University iha Melbourne, fatin ne’ebé nia hanorin durante tinan barak nia laran.
Helen mós hanesan co-organizadora bienál bá Victoria University no mós Universidade Nacional Timor Lorosa’e (UNTL) no sai hanesan Professora konvidada iha Universidade Nasionál Timor Lorosa’e (UNTL) no membru onorária iha Victoria University.
Helen hetan kondekorasaun ho Ordem de Timor-Leste tanba ninia solidariedade bá Timor-Leste, iha tinan 2014. Helen mós hanesan co-fundadora bá Assosiasaun Austrália-Timor Leste.
“Helen Hill ajuda partilla ita-nia istória no ita-nia luta bá mundu. Nia eduka estudante rihun bá rihun. Ema barak sei saudades nia,” Xanana Gusmão hateten iha deklarasaun ofisiál ne’e.
TATOLI
